BAU: Unit Pelajar Sepemanjai Idup (PSH) Kolej Komuniti Mas Gading (KKMG) nampung inisiatif negapka raban pedagang ba Pelilih Menua Lundu/Sematan nengah Kus Nanam Kulat Tiram Kelabu.
Program ti diatur nengah kerejasama Gerempung Tani enggau Penternak Lundu/Sematan (PETAPEN) nya meri peluang ngagai pedagang nambahka ekonomi rama sida.
Tuai Unit PSH KKMG, Lenny Lai Mei Lan madahka program ti diatur spengelama dua hari nya fokus ngagai pemansang pedagang.
“Kus tu diatur bekau ari minat bala penyereta ti deka nambahka penau enggau penemu diri.
“KKMG seruran muka peluang kerejasama enggau ngatur kus dikena mantu raban B40 awakka penau enggau penemu sida meri pemaik ngagai ruang bilik,” ku iya.
Mei Lan mansutka jaku nya lebuh ngulu kus di Balai Mensia Mayuh Kampung Judin Lundu, kemari.
Ku iya, program nya siti ari chara ngelakuka kolej sida ngagai mensia mayuh awakka ulih nyendiaka bemacham kus ti patut sereta majak dikelala.
“Kelimpah ari Kus Nanam Kulat Tiram Kelabu, bisi mega diatur Kus Simenfero di SK Tarat, Serian iya nya ngaga simenfero enggau ngelangkar landskap taman.
“Aku andalka raban penyereta bulih pemaik ari kus ti diatur KKMG awakka sida nemu nama kereban, chara ngaga, chara ngintu kelebih agi baka nanam kulat enggau ngaga simenfero ti betul,” ku iya.
