Kluster Abell di Kuching ngerikod 12 kes positif

KUCHING: Pelilih Kuching ngerikod siti kluster baru iya nya Kluster Abell pengudah ngerikod 10 kes baru kemari ba Pending enggau Padungan lalu Sarawak ngerikod 13 kes iya nya 12 kes ba Kuching enggau siti kes ba Lawas ngujungka nambah ngagai 1,032 kes.

Kes indeks ba kluster tu ditemu positif asil diperesa ba sebuah makmal perubat peribit kena 10 November tu tadi ke alai bisi 13 kes positif dikelala ari pengawa nyidi kontak.

Komiti Penyangga Penusah Ngenyit Nengeri (JPBN) Sarawak madahka, semua kes udah dipasuk ba Sepital Besai Sarawak (SGH) enggau bisi 70 iku udah diperesa naka 12 tengahari kemari.

Chairman iya, Datuk Amar Douglas Uggah Embas madahka 14 kes positif (10 kes baru), 13 iku ditemu negatif enggau 43 iku agi nganti pemutus makmal.

Kemari, Pelilih Limbang bebali ngagai status gadung baru pengudah nadai ngerikod kes pengelama 14 hari ke udah enggau Pelilih Lawas udah bebali ngagai status kuning pengudah ngerikod siti kes baru kemari.

Iya madahka bisi 10 kes positif lalu kes tu diperesa laban bisi kontak semak enggau kes positif ti udah diripotka sebedau tu lalu semua kes nya udah beperesa ba klinik pengerai nengah pengawa nyidi kontak.

“Kes ke-1020, 1020, 1022, 1023, 1024, 1028 enggau 1029 nya anak enggau kontak semak serumah ngagai dua iku melaki bini kes ke-1,010 enggau 1,012 ti diripotka kena 11 enggau 12 November tu tadi.

“Kes ke-1020, 1021 enggau 1028 nya udah mantaika kelai kena rampit berengkah ari 6 November tu tadi,” ku iya.

Pia mega ku iya, kes 1025 nya bakih sama gawa enggau kontak semak ngagai kes ke-1021 lalu iya madahka diri batuk enggau renga berengkah ari 9 November tu tadi.

Ku iya, kes ke-1026 nya anak enggau kontak semak serumah enggau dua iku melaki bini iya nya kes ke-1027 enggau 1028 seraya kes ke-1207 nya bini enggau kontak semak ngagai kes ke-1028.

“Semua kes nya nadai mantaika kelai kena rampit Covid-19 seraya kes ke-1020 ngagai 1029 nya tujuh iku lelaki enggau tiga iku indu beumur entara 5 ngagai 28 taun.

“Kes ke-1032 nya siku orang tuai ti mega kontak ngagai kes ke-967 ngaul Kluster Wisma Saberkas iya nya kontak ba endur kes ke-967 gawa. Iya udah beperesa Covid-19 ba klinik pengerai perintah kena 12 November tu tadi lalu ditemu positif ba hari ti sama,” terang Uggah.

Bekaul kes bisi kelai kena rampit, kes ke-1030 nya siku lelaki ti mega pengereja peribit ti ditemu positif Covid-19 kena 12 November tu tadi laban renga enggau batuk kenyau ari 10 November tu tadi.

Nambahka nya, Uggah madahka siti kes dirikodka ba Pelilih Lawas nya kes ke-1031 nya siku lelaki ti mega siku pinchin perintah ti beperesa ba Sepital Queen Elizabert, Kota Kinabalu.

Iya mega madahka lelaki nya udah dipasuk ba Sepital Lawas kemari sebedau dianjung ngagai wad isolasyen Sepital Miri laban madahka diri pedis rekung kenyau ari 9 November tu tadi.

Bisi lapan kes udah suman enggau dikemendar pansut ari sepital ngujungka kes suman nambah 890 iku tauka 86.24 peratus sereta 123 iku agi diperubat iya nya 109 iku ba SGH enggau 14 kes ba Sepital Miri.

Suara Sarawak