Kluster baru ditemu ba Miri enggau Serian

KUCHING: Opis Pengerai Nengeri Sarawak (JKNS) udah ngenukuka dua agi kluster baru ba Pelilih Miri enggau Serian.

Kluster Senadin di Miri nya kluster komuniti mungkur sebuah palan latih maritim di Lorong Desa Senadin, Lutong.

Indeks kes ngagai kluster tu iya nya kes ke-12,919 nya siku lelaki peranak menua beumur 22 taun ke mega pelatih ba palan nya ti ditemu positif nengah pengawa meresa sida ti ditemu bisi kelai kena rampit kena 15 March tu tadi ba Sepital Miri.

Lelaki nya dipelaba kena rampit nengah kontak kasual ari komuniti entara 1 ngagai 14 March tu tadi. Naka tu, kluster tu mungkur dua pelilih iya nya Pelilih Miri enggau Mukah.

Bisi 173 iku udah diperesa ke alai 30 kes ditemu positif Covid-19 nyengkaum kes indeks, 59 iku negatif enggau 84 kes agi nganti pemutus.

Pia mega, 29 iku ti ditemu positif nya udah dipasuk ngagai PKRC Miri enggau siku ba PKRC Mukah ngambi diperubat.

Nambahka nya Kluster Batu Gong di Serian nya mega siti kluster komuniti ti udah ditemu ba Kampung Batu Gong, Pelilih Mit Siburan di Serian.

Indeks kes ngagai kluster tu iya nya kes ke-14,157 mungkur siku indu peranak menua beumur 46 taun ti udah ditemu positif lebuh beperesa laban bisi kelai kena rampit kena 19 March tu tadi di Klinik Pengerai Siburan.

Indu ti gawa kediri nya engka kena rampit ari komuniti lalu iya ngerampit orang bukai di genturung pendiau nya nengah kontak semak.

Bisi 496 iku udah diperesa ke alai 50 iku udah ditemu positif Covid-19 nyengkaum indeks kes, 146 kes ditemu negatif enggau 300 kes agi nganti pemutus.

Semua 50 iku ti ditemu positif nya udah dipasuk ngagai Sepital Serian enggau PKRC Serian ngambika diperubat.

Suara Sarawak