Kluster baru ditemu di Tebedu enggau Sebauh

KUCHING: Komiti Penyangga Penusah Nengeri (JPBN) ngenukuka dua kluster baru Covid-19 ditemu di nengeri tu taja empat kluster ditukuka punas.

Kluster baru tu iya nya Kluster Tebedu Mawang ba Pelilih Menua Tebedu enggau Kluster Jejalong ba Pelilih Menua Sebauh.

Kededua kluster tu ngaul komuniti iya nya komuniti di dua buah kampung ba Pelilih Menua Tebedu enggau sebuah komuniti rumah panjai di Tubau, Sebauh.

Udah nya, empat kluster ti ditukuka punas iya nya Kluster Depot Imigresen Semuja, Serian, Kluster Lorong Desa Senadin, Miri, Kluster Kampung Baru Hilir, Samarahan enggau Kluster Jalan Badarudin, Kuching.

Empat buah kluster tu ditukuka punas laban nadai ngerikodka kes positif baru dalam timpuh 28 hari.

Pia mega, penerang nya madahka JPBN ngaga pemutus bejalaika Atur Mindah Betagang Diteritka (PKPD) ba tiga buah rumah panjai.

Tiga buah rumah panjai tu iya nya Rumah Boniface Manggie, Ulu Ranan, Kanowit, Rumah Tatom, Ng Tabau, Batang Oya, Stapang, Selangau enggau Rumah Andin, Sungai Bejait, Kanowit ti deka bejalaika PKPD berengkah 10 nyentuk 23 Mei tu ila.

Suara Sarawak