Kluster Besi enggau Kluster Greenhill da agi ngerekai di Sarawak

KUCHING: Kemari Kluster Wisma Saberkas ditukuka punas pengudah nadai ngerikodka kes Covid-19 baru dalam timpuh 28 hari.

Komiti Penyangga Penusah Ngenyit Negeri (JPBN) dalam penerang media madahka naka tu semina dua iti kluster agi ngerekai iya nya Kluster Besi enggau Kluster Greenhills.

JPBN mega madahka nadai kes positif baru Covid-19 dirikodka ba Sarawak kemari ke alai penyampau kes positif Covid-19 tu mengkang 1,075 kes.

Kelimpah ari nya, bisi siti kes baru udah suman sereta dikemandarka pansut ari Sepital Besai Sarawak dirikodka ti ngujungka penyampau kes Covid-19 udah suman sereta dikemandarka pansut ari sepital kemari nambah 1,044 kes.

Penyampau kes ti agi diperubat ba sepital diatu bisi 12 iku iya nya sepuluh iku di Sepital Besai Sarawak, siku di Sepital Bintulu enggau siku di Sepital Miri.

Pelilih Menua Serian enggau Kuching agi ba status kuning enggau penyampau tiga iti kes berampit dalam timpuh 14 hari.

Taja pia, 38 buah pelilih menua ke bukai agi mengkang ba status gadung.

Mensia mayuh dipinta sama nyaga pengelikun diri baka ngena sengkabung mua ba palan mensia mayuh, nyaga takah enggau seruran nuchi jari dikena nagang pengerekai penyakit Covid-19.

Suara Sarawak