Kluster Bintang Daily punas, tiga agi kluster baru ditemu

KUCHING: Kluster Bintang Daily ba Pelilih Menua Meradong ditukuka punas, taja pia bisi tiga agi kluster baru ditemu di Sarawak sehari tu.

Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka kluster baru tu iya nya Kluster Jalan Main Bazaar di Pelilih Menua Sri Aman, Kluster Buluh Pasi di Pelilih Menua Meradong enggau Kluster
Sena di Pelilih Menua Miri.

“Tu ngujungka penyampau kluster Covid-19 ti agi benung ngerekai ba Sarawak bisi 28 kluster.

“Kluster Jalai Main Bazaar siti kluster komuniti ngaul sebuah ruang bilik ti ngujungka penyakit nya ngerekai ngagai nembiak sekula primari di Sri Aman,” ku iya.

Uggah bejaku munyi nya ba Aum Media Covid-19 di Dun Lama ditu, tadi.

Tandu iya, kluster tu datai ari siku indu beumur 52 taun ti tama ba Sepital Besai Sarawak kena 1 Mac tu tadi.

“Asil pansik ngagai orang ti bekaul, bisi 11 kes positif nambah iya nya ruang bilik kes indeks.

“Tu nyengkaum dua iku bakih sekula ngagai siku nembiak ti bekaul rat enggau kes positif Covid-19 nya,” ku iya.

Kelimpah ari nya, Uggah madahka Kluster Buluh Pasi mega ditukuka kluster komuniti ngaul sebuah rumah panjai di Sungai Buluh Jalai Pasi di Meradong.

Ku iya, kluster tu ditemu ari kes indeks ke-7,689 ti diperesa pengaji iya ba palan gawa di Klinik Lanang, Sibu.

“Asil pansik ari orang bekaul ngagai kes tetemuka 20 kes positif baru Covid-19 nambah nyengkaum tiga kes ti dirikodka sehari tu (kemari).

“Berebak enggau nya, Kluster Sena di Miri dirikodka datai ari kes indeks di Lorong Sena Desa Senadin Permyjaya enggau dua buah rumah panjai di Pelilih Menua Subis.

“Kluster tu datai ari kes indeks ke-8,866 iya nya siku indu beumur 47 taun ti ditemu positif Covid-19 kena 24 Februari tu tadi,” ku iya.

Uggah madahka, penyampau 166 iku orang udah diperesa nengah kluster tu ke alai 61 iku ditemu positif Covid-19, 95 iku negatif seraya 10 iku agi nganti pemutus peresa makmal.

Suara Sarawak