Kluster Buloh ngaul tiga rumah panjai di Sibu

KUCHING: Opis Pengerai Nengeri Sarawak ngenukuka siti agi kluster baru kemari dikumbai Kluster Buloh di Sibu.

Kluster Buloh ngaul tiga buah rumah panjai di genturung Sungai Buloh ba Pelilih Menua Selangau.

Kluster tu datai ari siku indu beumur 32 taun ti diperesa laban ngembuan tanda kena rampit kena 21 Februari tu tadi.

Indu nya bepun nunjukka kelai nya kena 17 Februari lalu kes berampit dipelaba nengah kontak semak enggau peranak di rumah panjai.

Asil ari pansik ba kes tu dia bisi 27 iku kes positif baru Covid-19 ditemu.

Berindik ari nya, bisi 68 iku udah diperesa ke alai 28 iku ditemu positif, 36 iku negatif enggau empat iku agi nganti pemutus peresa makmal.

Semua 28 iku sida ti positif nya udah dipasukka ba Sepital Sibu.

Naka tu, Sarawak ngerikodka sepenyampau 27 kluster agi ngerekai. Nya alai, mensia mayuh diperansang terus nitihka SOP ke udah ditetapka perintah.

Suara Sarawak