KUCHING: Covid-19 ari Kluster Jeti ke dirikodka di Sarawak kenyau 19 Julai tu tadi dikenuku udah punas.
Komiti Penyangga Penusah Ngenyit Nengeri (JPBN) dalam siti penerang media seharitu madahka kluster tu ngaul sebuah jeti kapal berikan di Pending.
Ku JPBN, kluster tu bepun ari dua iku pekereja menua bukai di sebuah serikat orang berikan di Pending.
Kes keterubah (Kes-584) bepun ditemu lebuh kes dianjung pengaji iya ngagai sebuah sepital peribit di Kuching ngaga peresa pengerai sereta diperesa Covid-19 kena 9 Julai.
Kes lalu ditemu positif ba hari ti sama ti ngujungka kes kedua (Kes-603) ditemu laban iya orang ti pemadu semak enggau kes keterubah.
Kededua kes positif tu nadai nunjukka sebarang tanda Covid-19 lalu seduai mega nadai bisi sejarah nemuai ngagai menua luar dalam timpuh 30 hari sebedau ditukuka positif Covid-19.
Tandu JPBN, seduai udah berubat ba Sepital Besai Sarawak, udah suman sereta dikemendarka pansut ari sepital kena 30 Julai tu tadi.
JPBN madahka, bisi 68 iku orang ti bekaul iya nya 29 orang menua tu empu enggau 39 iku rayat menua bukai udah diperesa.
Asil ari pansik tu, Opis Pengerai Nengeri Sarawak udah mujur tetemuka siti kes (Kes-603) ti positif tang 67 agi ke bukai negatif.
Kluster Jeti Kuching ditemu berampit dalam komuniti, taja pia kluster tu udah mujur ditagang ketegal kerejasama Opis Pengerai Nengeri Sarawak enggau semua raban dalam JPBN ti ngujungka kluster nya ditukuka punas seharitu.
Pia mega, JPBN madahka nadai kes positif Covid-19 dirikodka ba Sarawak kemari ti ngujungka kes positif Covid-19 di menua tu mengkang 682 kes.
