Kluster Mador punas, tinggal 10 kluster agi ngerekai di Sarawak

KUCHING: Kluster Mador di Pelilih Menua Maradong ditukuka udah punas ari Opis Pengerai Nengeri Sarawak kemari laban nadai ngerikodka kes positif baru Covid-19 sepengelama 28 hari.
Komiti Penyangga Penusah Ngenyit Nengeri (JPBN) dalam siti penerang media kemari madahka kluster tu nyadi kluster neresa pelilih menua berindik ari kes ke-1,115 ti ditemu positif Covid-19 asil ari peresa orang ti baru pulai ari palan berisiko tinggi dirampit.
Taja pia, bisi sepuluh kluster agi ngerekai ba Sarawak iya nya Kluster Tabong, Kluster Indah Riang, Kluster Bedayan, Kluster Rakut, Kluster Bukit Sekubong, Kluster Jelita, Kluster Pasai, Kluster Keranji Tabuan enggau Kluster Stutong.
Nangkan nya, Pelilih Menua Matu enggau Daro bebali ari status gadung ngagai status kuning kemari pengudah ngerikodka 13 kes berampit dalam timpuh 14 hari.
Pelilih Menua Asajaya di Bagi Menua Samarahan udah pulai bebali ngagai status gadung pengudah nadai ngerikodka kes positif baru Covid-19 dalam timpuh 14 hari.
Berebak enggau nya, Pelilih Menua Song, Dalat, Bintulu, Kanowit, Beluru, Miri, Sibu enggau Kuching agi mengkang ba status mirah enggau penyampau kes positif 1,920 kes berampit dalam timpuh 14 hari.
Kelimpah ari nya, Pelilih Menua Kapit, Sarikei, Subis enggau Betong agi mengkang ba status oren ke alai Pelilih Menua Lundu, Sebauh, Lawas, Telang Usan, Bukit Mabong, Tatau, Bau, Pakan, Serian, Belaga, Meradong, Julau, Simunjan, Lubok Antu, Selangau, Samarahan enggau Sri Aman mengkang ba status kuning.
Naka diatu, semina semilan pelilih menua ba Sarawak agi mengkang ba status gadung.