KM ngabang TBC ngagai rumah Richard Wee

KUCHING: Kepala Menteri Datuk Patinggi Abang Johari Tun Openg ngambi peluang ngabang ba Hari Kedua Taun Baru China (TBC) 2020.

Pengudah ngabang ngagai rumah bala pemesai enggau menteri China kemari, sehari tu Abang Johari ngabang ngagai rumah Presiden Serakup Besai Gerempung China Bagi Menua Kuching, Samarahan enggau Serian Datuk Richard Wee.

Penatai iya enggau bini iya Datuk Amar Juma’ani Tu Tuanku Bujang ba rumah nya disambut Richard enggau bini iya Datin Donna Wee.

Raban media enggau bala pemesai dinahka enggau mayuh macham pemakai baka rojak buah enggau putu mayam.

Bela bisi nyempulang Abang Johari, Sapit Kepala Menteri Tan Sri James Jemut Masing, Menteri Dagang Temuai, Seni enggau Main Asal Datuk Abdul Karim Rahman Hamzah, Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Datuk Sharifah Hasidah Sayeed Aman Ghazali, Kaban Parlimen Batang Sadong Datuk Seri Nancy Shukri enggau Sapit Chairman Parti Pesaka Bersatu Bumiputera Pampang Satok Datuk Ibrahim Baki.

Suara Sarawak