KMKK, JKKK nyaup meri penerang betul

SIMANGGANG: Ketuai Komuniti enggau Ketuai Raban Bansa (KMKK) sereta Komiti Pemansang enggau Pengelikun Genturung Pendiau (JKKK) patut sereta enda tau enda meri penerang betul ngagai rayat renggat baruh.

Kaban Kaunsil Nengeri (Adun) Bukit Begunan, Datuk Mong Dagang madahka penerang betul tau ngasuh rayat bisi pengandal enggau sepenemu enggau perintah Sarawak.

Ku Mong, rayat diatu mudah teparuk enggau penerang ke bisi sebelah media rama ngujungka sida enda nemu ni bagi pengamat cherita tauka ripot dibantai dia.

“Media rama diatu suah endur nabur berita amat enggau bula ngena mayuh chara lalu tebal agi bisi niat enda lurus. Nya kebuah KMKK enggau JKKK meseti ngenukuka berita sebedau meri penerang ngagai komuniti renggat baruh,” ku iya ngelalau.

Mong mansutka jaku nya rambau Randau Gerempung Ketuai Raban Bansa Bukit Begunan, ditu tadi.