KMKK Lubok Antu mantah MPKK

KUCHING: Komiti Ketuai Komuniti enggau Tuai Rumah (KMKK) Lubok Antu mantah pengawa Perintah Besai Pakatan Harapan (PH) ti keran deka numbuhka Majlis Pengurusan Komuniti Kampung (MPKK) ditumbuh ba sitak Batang Ai enggau Engkelili.

Nitihku Chairman KMKK Lubok Antu, Pemanca Ja’au Anak Jagit, pekara pemaik enggau pengelantang rayat udah mujur diintu Komiti Pengelikun enggau Pemansang Genturung Pendiau (JKKK) enggau manah ngelamatu.

Ku iya, nyema MPKK nya ditumbuh, majlis nya semina deka mai penyarut ngagai peranak di rumah panjai.

“Ketegal nya, kami bala tuai-tuai rumah panjai di kandang menua Lubok Antu endang mantah MPKK ditumbuh ba kandang menua kami,” ku Ja’au.

Iya mansutka penemu nya ba program gempuru begulai enggau 78 iku bala tuai rumah panjai di Dewan Pemancha Chua Teng Yew di Lubok Antu, seharitu.

Tambah Ja’au, bisi sekeda rumah panjai di kandang menua Lubok Antu udah digusung orang ke dipadahka bisi kaul enggau pengawa numbuhka MPKK tu.

“Raban tu bisi mai pom ngambi tau diisi diisi peranak rumah panjai.

“Tang kami enda nerima penatai sida lalu madahka enda besetuju enggau MPKK ditumbuhka,’ ku iya.

Ja’au pechaya MPKK tau enda ibuh ditumbuh ketegal sistem JKKK ti bisi ngelamatu nyata udah bejalaika tanggungpengawa enggau manah sereta efektif ba atur mantu rayat.

Ba pengawa nya mega, Tr Albert Kelinsing Anak Pemanca Manau madah, nyema tuju MPKK nya ditumbuh dikena mantu rayat, Perintah Besai Pakatan Harapan (PH) ulih mega meri bantu agih belanja nengah JKKK di tetiap rumah panjai.

”JKKK udah chukup manah sereta nyata ulih ngemujur mayuh bengkah aktiviti sereta mai mayuh pemaik ngagai nembiak redak.

“Enti sida (PH) amat keran deka mantu rayat, sida patut meri sukung ngagai JKKK tang ukai numbuhka sebuah agi organisasyen ke sama tanggungpengawa ba sesebengkah kandang menua,’ku Tr Albert.

Iya ti ngarika Persatuan Tuai Rumah Zon 3 Ulu Batang Ai madah MPKK deka mambarka nembiak redak nengah penemu ke bebida.

Bela sepenemu enggau Ja’au sereta Tr Albert, Pemanca Chua Kee Long ari Ketuai Raban KMKK bansa China madahka penumbuh MPKK tu enda meri pemaik.

Ku iya, MPKK nya tebal agi deka mambarka penyerakup komuniti enda ngira bansa Iban, China tauka Melayu.

”Pengari rayat kami iya nya Menteri Muda Beranakka Puku enggau Industri ke mega Adun Batang Ai,Datuk Malcolm Mussen udah bebendar mai pemansang di kandang menua Batang Ai nyengkaum di semua rumah panjai.

”Iya udah meri mayuh Projek RTP/Projek Khas Rakyat sereta ngemansangka mayuh infrastruktur ungkup pengelantang peranak di rumah panjai.

“Nya alai, nadai kebuah kami nyukung MPKK ditumbuh,” ku iya enggau nyemetak.

Bela datai Pengulu Lembang ari menua Batang Ai Ili, Penghulu Chabi (Lemanak Ulu), Penghulu Inchang (Kesit, Engkilili) enggau Tr David Ujan ti ngarika Gerempung Tuai Rumah sitak Ulu Engkari.