SIMANGGANG: Komiti Orang Indu SUPP Pampang Simanggang udah ngintu Pengerami Kuih Bulan dikena ngenang sejarah komunikasyen maya apin bisi arus perengka penyambung kelia.
Chairman SUPP Pampang Simanggang, Datuk Francis Harden Hollis bejadika program nya begulai enggau Chairman Komiti Orang Indu, Kapitan Ling Siew Hung besereta enggau Chairman Raban Nembiak, Tuai Rumah Igai Janting.
Kelai ngintu Pengerami Kuih Bulan maya jeman kelia nyadi siti chara ngerembaika berita pasal pengawa raban komunis ti megai menua maya nya.
Berita ditulis dalam siti keretas lalu dipasukka dalam kuih bulan awakka orang ti makai kuih nya ulih nemu jaku tesau ngena chara betulis.
Kemaya tu, Pengerami Kuih Bulan udah nyadi siti kelai penyerakup enggau adat bansa China dalam pengawa ngelaban pekara ti enda manah maya jeman pemansang penyambung nadai adan menua diatu.
“Taja tuju ngintu pengerami tu udah chukup bebida, pengawa ti nyadi kelai adat bansa bakatu endang patut semampai diperansang ngagai bala rebak baru,” ku Adun Simanggang nya.
Pengerami nya diintu ba rumah Harden sereta nitihka Atur Pengawa Standard (SOP) ti udah dikeluarkan JPBN Sarawak dikena nagang pengerekai igi penyakit Covid-19 dalam komuniti sebedau iya nya berubah nyadi endemik.
Sama bisi datai ngulu ke pengawa nya Penghulu Mingging Sigan, Kaunselor Andar Suntai, Kaunselor Denneil Saweng, Encik Belilie Ajah, Empaga Bailey enggau raban SUPP Pampang Simanggang ti bukai.
