Komiti ketuai Iban ditumbuh mutar isu seranta di mengeri

KUCHING: Perintah Sarawak udah teulihka chara mutarka isu seranta ba kandang mengeri dalam komuniti Iban di nengeri tu nengah numbuhka sebuah komiti digulu ketuai raban bansa Iban.

Sapit Kepala Menteri Datuk Amar Douglas Uggah Embas madah, komiti tu diarika siku Temenggung, siku Pemancha, tujuh iku Penghulu enggau sekeda Tuai Rumah ari menua tu.

“Komiti tu deka chakah ngiga orang ke begunaka bantu kelimpah beratika penanggul ti ditapi sida ngujungka tepejuh dalam kategori seranta dalam mengeri.

Ku iya, mayuh pupu raban bansa Iban untung laban ngembuan pengidup ke lebih manah, ngembuan rumah kediri sereta bala anak ti mujur.

“Sida ulih bediri sama tinggi, duduk sama baruh enggau komuniti bukai di menua tu.

BEJADI…Sapit Kepala Menteri Datuk Amar Douglas mangkung tawak kelai bejadika pengerami diatur gerija Christ Baptist (SIB), ditu, malam ensana.

“Nambahka nya, bisi sida ti benasit enda manah, peranak setingan enggau anak sida nyadi mangsa ketegal gaya pendiau sida ke diatu,” ku iya ba pengawa makai lemai amal diatur Gerija Christ Baptist ba ditu, malam ensana.

Uggah ti nyadi Menteri megai tanggungpengawa ungkup Unit Pengarap Bukai (Unifor) madah, iya tekenyit lebuh dipadah pasal pengawa nyendia pemakai pechuma diatur sebuah gerempung meri pemakai ngagai 300 iku ninting ari, tebal agi sida tu ari komuniti Iban.

“Kitai deka ngabas peranak setingan tu, sida tu diau enda jauh ari tebing sungai sereta besemeka enggau kandang pendam. Ngambika ulih berundingka langgur dikena mutarka pekara tu,” ku iya.

Iya madah mayuh perengka enggau program disediaka perintah sereta sektor swasta ngagai peranak tu, nyengkaum bantu dalam bidang betanam betupi, pelajar, pengintu pengelantang enggau ngepunka dagang.

“Aku meri lalau ngagai semua kitai nyengkaum gerija ngambika sama ngumpul belanja mantu sida iya,” ku iya.

Uggah mega ngelalau rayat ngambi nyaga pengelikun ari sida ti ngembuan penemu ti deka ngeruga runding rayat Sarawak pasal raban bansa tauka pengarap.

“Kitai nadai sebarang isu ba nengeri tu ti ulih ngeruga pekara tu. Nya alai, aram meh kitai meri perati ngambi negika solidariti kitai lebuh mantu rayat, nengeri enggau menua kitai ngambika terus mansang,”ku iya.

Iya mega madahka geran sepenyampau RM400,000 ungkup gerija enggau pengawa ngemanahka pala nyeridi anak mit sida, kelimpah meri RM30,000 ungkup aktiviti ngumpul bantu nya.

Sama bisi datai Kaban Parlimen Kanowit Datuk Aaron Ago Dagang enggau bini iya Datin Rowena sereta Chairman Pengatur Pengerami Jimbai Majang.

Suara Sarawak