Komiti pengatur pekit lumba moto begunaka bantu

KUCHING: Litar lumba ti kurang menyana, ngulihka permit, ungkus logistik enggau insuran entara pemar ke ditapi komiti pengatur pekit lumba kerita enggau motosikal di Sarawak dalam ngatur program ninting taun nya dikena matak raban peminat lumba moto ari menua luar.

Presiden Dragrace Club Sarawak Mohamad Sofian Fariz madah, mayuh pemar ditapi dalam ngatur pekit lumba drag laban ngena jalai raya.

“Dalam ngulihka permit ari piak polis enggau insuran chukup pedis lalu bepanggai ngagai runding enggau piak nya.

“Tang kitai meri terima kasih ngagai piak insuran laban udah ngemendarka peminta insuran ungkup bala pelumba,” ku iya maya dirandau Suara Sarawak kemari.

Tandu Sofian, pemar bukai dalam ngatur pekit lumba nya baka ungkus logistik laban sida beguna belanja dikena nyikap perengka guna baka generator, kanopi, pagar, agu mindah kin kitu enggau ke bukai.

“Lebih ngenyinu maya Dragbattle 2019 ke diatur apin lama ke udah lebuh bakih kitai ari menua Brunei matak diri ari nyereta lumba drag kerita laban pendiau trek lichin sereta basah,” ku iya.

Kelimpah nya, iya ngarapka Perintah Nengeri nyendiaka perengka guna ungkup lumba moto awakka sida ari piak ngatur permit, logistik enggau pekara bekaul enggau lumba moto nadai penanggul mantu piak pengatur pekit tu.

“Kitai mega ngarapka perintah nengeri ulih mantu ari sukut belanja laban lumba tu ulih ngurangka kes lumba nadai pemendar di Sarawak.

“Naka tu, komiti pengatur udah ngeluarka belanja diri empu dikena ngatur program lalu nadai nerima bantu belanja ari sebarang piak,” ku iya.

Suara Sarawak