Komiti PKR Saratok pansut parti

SARATOK: Urung 30 iku kaban Komiti (AJK) Parti Keadilan Rakyat (PKR) Pampang Saratok ngaga pemutus pansut ari parti tekala nya.

Sida tu nyengkaum Ketuai AJK Indu PKR Besai Rosita Mon enggau Ketuai Angkatan Muda Keadilan (AMK) Bonny Lansoi.

Ex-Sapit Ketuai Pampang PKR Saratok, William Barang Usop madah, pemutus tu digaga laban sida mengkang meri sukung penuh ngagai Sapit Menteri Kuasa enggau Pengeraja Asal Ali Biju ti mega Kaban Parlimen Saratok ke udah dibuai ari PKR rambau penyarut politik ke nyadi dalam pun taun tu tadi.

“Pemutus kami sebuat pansut ari PKR sehari tu laban udah lenyau pengarap ngagai parti nya lebih agi Presiden empu iya nya Datuk Seri Anwar Ibrahim ti dipeda udah kelalu balat jauh limpang ari tuju asal parti ditumbuh.

“Tu mega berindik ari gaya ulah Anwar ti kelalu balat nanahka siku-siku orang enggau bebagi tim dalam parti, pekara tu ngujungka kaban dalam parti tu pedis deka ngereja pengawa laban nadai penyerakup enggau pangan diri.

“Pengawa baka tu majak nyadi sereta nyengenda dikereja iya lebuh maya pengawa bepilih parti PKR di Melaka.

“Lebuh maya bepilih parti Anwar kala meri jaku tangkan nuju semua kaban dalam parti ti enda meri sukung ngagai chalun ti disukung iya deka ditingkil ari parti.

“Sebarang sapa enda meri sukung ngagai chalun dichiri iya deka dibuai ari parti kelimpah lenyau peluang nyadi chalun ba pengawa bepilih besai tauka ba kaunsil nengeri ti deka datai.

Iya ke mega ex-sapit tukang wang PKR Saratok madah munyi tu ba Aum AJK PKR Saratok ti diatur ba Palan Servis Komuniti parti nya pagi tadi.

William Barang Usop

Suara Sarawak