KOTA SAMARAHAN: Pengawa numbuhka Komiti Sains, Teknologi, Injiniring enggau Matematik (STEM) disadang ditumbuh ba taun tu dikena negapka agi pengawa nyeraris pelajar kelimpah graduet ti enda setipak ba kus nya.
Menteri Sains, Teknologi enggau Inovasyen (MOSTI), Chang Lih Kang madah, inisiatif nya dikena mutar isu penyampau nembiak sekula sekondari ti milih kus STEM majak bekurang lebuh sida nampung pelajar sida ngagai tikas ti tinggi agi.
“Komiti tu deka ditumbuh ba taun tu lalu berapa bulan ti udah, kami udah bejalai lalu nyikap diri ba bemacham pekara bekaul pengawa numbuhka komiti tu,” ku iya.
Chang mansutka jaku nya rambau dirandau pemberita pengudah Program Bejadi Pengerami Minggu Sains Menua (MNS) 2023 sereta Malaysia Techlympics 2023 Renggat Nengeri Sarawak ba Universiti Malaysia Sarawak (UNIMAS) ditu, sehari tu.
Ngelansa silik, iya madah, opis menteri sida udah ngatur aum begulai enggau opis menteri bekaul ti bukai baka Opis Pelajar Malaysia, Opis Menteri Pelajar Tinggi, Opis Menteri Pengereja Pengawa enggau ti bukai.
“Udah tu, kitai deka numbuhka sebuah komiti begulai dikena mutar isu minat nembiak ngagai kus STEM ti majak bekurang lalu kitai deka ngatur aum timpuh pandak bekaul pengawa numbuhka komiti STEM.
“Naka diatu, aum ba renggat komiti kereja begulai enggau Tuai Sekretari (KSU) ari sekeda opis menteri udah dipejalai lalu pengudah tu kitai deka ngatur aum entara semua opis menteri bekaul,” ku iya.
