Kompleks baru Opis Pelilih Bau tembu April tu

BAU: Pengawa numbuhka Kompleks Opis Pelilih Bau baru beungkus RM4.6 juta disadang tembu ujung bulan April tu.

Adun Tasik Biru Datuk Henry Harry Jinep madahka, projek ngaga kompleks nya tejanggal ketegal Atur Mindah Betagang (PKP) ngujungka bala kunteriktor udah ngelanjar timpuh projek nya tembu nyentuk bulan Julai tu.

“Taja pia, kami udah minta bala kunteriktor ngerumban pengawa ngaga projek nya ngambi ulih tembu bulan April enggau ulih dibuka bulan Mei tu.

“Diatu, kompleks nya udah tembu urung 70 peratus lalu benung nyambung karan enggau nyendiaka perengkaguna dalam kompleks nya,” terang iya.

Henry mansutka jaku nya ba aum pemberita Program Nyadung Sengkabung Mua ba sitak Bau di Pasar Tasik Biru, ditu kemari.

Ku iya, projek nya lanchar dipejalai lalu semina napi penanggul maya PKP laban tebal agi pengereja nya peranak Indonesia ke alai sida enda dikemendar tama ngagai menua tu lebuh nya.

“Kami udah ngambi peranak menua gawa ngambi nampung pengawa dia dia ketegal suntuk pengereja tang naka tu, semua pengawa lanchar dipejalai lalu ngarapka projek tu ulih tembu bulan April ila,” terang iya.

Penembu kompleks nya deka nyadi ikon baru ba Bau enggau nyadi palan pengatur pengawa kelimpah endur Kort Bumiputera lalu langkar tengkebang iya nunda baruk Bidayuh.

Nya mega entara projek rayat di Tasik Biru ti dipejalai Perintah Sarawak sereta beguna amat dikena nukar begunan ke diatu endur Opis Pelilih Bau ti beumur lebih 80 taun nya.

Datuk Henry Harry Jinep

Suara Sarawak