Kompleks Lumba Balai Ringin endur ngangkatka penau raban nembiak

BALAI RINGIN: Kompleks Lumba Balai Ringin deka meri pemaik ngagai 50 buah sekula besemak dalam ngangkatka aktiviti lumba di menua tu.

Menteri Muda Nembiak enggau Lumba ti mega Adun Balai Ringin Datuk Snowdan Lawan madahka kompleks lumba tu ngembuan peluang besai ngayanka penau raban nembiak rebak baru ba aktiviti lumba.

“Ungkup penerang, bisi 15 iku atlit menua enggau entarabansa di Sarawak datai ari sitak Balai Ringin.

“Raban atlit tu tebilang ba lumba main bol, ragbi, hoki, tennis, sepak takraw, belanda 100 meter, 200 meter enggau 400 meter,” ku iya.

Snowdan bejaku munyi nya lebuh Program Bejadika Kompleks Lumba Balai Ringin ditu, kemari.

Ku iya, kompleks lumba tu ila deka nyadi palan endur ngatur aktiviti lumba tiga buah zon iya nya Serian, Simunjan enggau Sri Aman (Golden Triangle).

“Penyulut raban atlit ti datai ari sitak Balai Ringin balat ngemegahka peranak ditu baka Anchah Buda atlet gumpal isi ti udah ngemegahka nama Sarawak ba tikas entarabansa.

“Kelimpah ari nya, kompleks lumba tu ila ulih endur ngatur program lumba enggau program nembiak laban ngembuan pemesai 20 ekar.

“Aku mega bisi perambu deka ngaga Palan Nembiak (Youth Centre) ba renggat kedua dikena ngiga nembiak rebak baru ti bepenau dalam aktiviti lumba nengah TVET, Tegas enggau ke bukai,” ku iya.

Ku iya, empas ari sekeda komponen infrastruktur ti deka digaga ba kompleks nya, iya minta agih belanja tambah penyampau RM5 juta.

“Enti agih belanja RM5 juta ditambah, kompleks lumba tu ulih digaga mungkur semua pekara.

“Aku andalka, kompleks lumba tu ila ulih ngiga nembiak rebak baru dalam aktiviti lumba awakka ulih diangkat ngagai tikas entarabansa,” ku iya.

Suara Sarawak