Kompleks Lumba beungkus RM8.9 juta digaga ba Debak

DEBAK: Pelilih Mit Debak deka ngembuan sebuah Kompleks Lumba beungkus RM8.9 juta sereta dipelanja penuh Perintah Sarawak.

Sapit Kepala Menteri Datuk Amar Douglas Uggah Embas madahka, nya siti ari projek pemansang ti dibai Gempung Parti Sarawak (GPS) ungkup rayat kelebih agi peranak Debak.

“Tabi puji ngagai orang Debak enggau Seribas, pengawa ngaga Kompleks Lumba Pelilih Mit Debak udah berengkah sehari tu (kemari) lalu disadang tembu dalam timpuh 12 bulan,” ku iya.

Uggah ti mega Menteri Menteri Betanam Betupi, Tanah Adat enggau Pemansang Kandang Menua bejaku munyi nya ngagai pemberita pengudah Program Nasih Tanah Kompleks Lumba Pelilih Mit Debak ditu, kemari.

Ku iya, kompleks tu beungkus RM8.9 juta digaga ba atas tanah pengeluas 10 ekar.

Iya mega ngarapka, kompleks tu ila deka nyadi palan ke ngembuan perengkaguna pemadu baru ngagai nembiak ngambika ulih ngayanka penau sida.

Berebak enggau nya, Temenggong Bagi Menua Betong Pi’ee Alwi madahka projek tu sebagi ari rejeki sida.

“Sebedau tu, peranak nadai kala berunding Debak deka ngembuan sebuah kompleks lumba.

“Nya alai, aku ngarika rayat Debak meri besai terima kasih ngagai Perintah Sarawak ti dipegai GPS, ke seruran beratika pemansang menua pesisir.

“Perengkaguna tu deka nyadi pejalai lumba ti pemadu diguna semya,” ku iya.

Tandu iya mega, enti kompleks nya udah tembu ila, sida ulih ngaga palan nya nyadi gelanggang endur ngiga nembiak menua tu empu ti ngembuan penau ba pengawa lumba.

Kelimpah ari nya, Pi’ee madahka, kompleks tu mega deka nyadi pelasar endur ngatur mayuh bengkah program rasmi baka begempuru bebala mayuh, aktiviti sekula, lumba ninting taun enggau ke bukai.

Kompleks Lumba Pelilih Mit Debak sebagi ari Projek Rayat Perintah Sarawak ti diletakka ba baruh patau Kaunsil Pelilih Menua Betong enggau kontraktor ti dipilih iya nya Cahaya Alam Murni Sdn Bhd.

Sama bisi datai Kaban Parlimen Betong Robert Lawson Chuat, Adun Saribas Mohammad Razi Sitam, Residen Bagi Menua Betong Friday Belik, Pemesai Pelilih Menua Betong Sofhi Jebal enggau Pemesai Penguasa Pelilih Mit Debak Nazari Bujang.

DOUGLAS UGGAH, Robert, Razi enggau bala temyai lebuh simbolik Program Nasih Tanah Kompleks Sukan Pelilih Mit Debak ditu, kemari. Foto. OSMAN RAZALI

Suara Sarawak