Kompleks Minyak enggau Gis deka digaga di Lawas

KUCHING: Ungkus USD5 bilion dikena beranakka puku dalam pemansang Kompleks Minyak enggau Gis di Lawas.

Kepala Menteri Datuk Patinggi Abang Johari Tun Openg madah sebengkah pansik udah dipejalaika sebedau projek tu diputuska deka dibuka di Lawas.

“Kompeni Beijing Beca Sci-Tech Co. Ltd enggau Sinopec Engineering Incorporation udah ngaga pansik ngaga semua palan ba selampur menua tu lalu Lawas ditemu chukup strategik alai ngagai kompleks tu.

“Dua raban kompeni tu meda Sarawak ngembuan pengelebih ba asil minyak lalu ulih ngaga kilang napis minyak, nya alai sida minta ngagai perintah Sarawak bekaul enggau kompleks tu,” ku iya.

Abang Johari madahka pekara tu ba aum pemberita pengudah nyadi saksi pengawa nyain Sempekat Pemereti Ati entara Perintah Sarawak enggau Beijing Beca Sci-Tech Co. Ltd enggau Sinopec Engineering Incorporation ba siti hotel tebilang ditu, kemari.

KELAI KEREJASAMA…Datuk Patinggi Abang Johari Tun Openg enggau Datuk Amar Awang Tengah Ali Hasan (tengah) serdta temuai bukai ngemataka pengawa betukar dokumen entara Hao (kiba) dan Liaw ti ngarika entara Sarawak, BECA enggau SINOPEC pasal Perambu Ngaga Kompleks Minyak enggau Gis Besai di Lawas ba sebuah hotel tebilang ditu kemari. -Gambar Gazhali Bujang

Nangkan nya, ku iya, entara kebuah ti nyadika Lawas siti palan alai nirika kilang penapis baru laban ngembuan tanah ti besai alai nirika kilang tu.

“Dua kompeni tu begunaka 400 hektar kena nirika kilang, lalu ba menua tu ngembuan bekal ai enggau karan ti chukup.

“Pia mega, Sarawak siti menua ti jauh ari penusah baka tanah berenyang sereta penusah bukai bekaul enggau rampa menua asal,” ku iya.

Kelimpah ari nya, Abang Johari madah bekal minyak mata tu deka diambi ari menua Timur Tengah, dikilang sereta ditapis di Lawas lalu dieksport ngagai makit orang ke nguna.

“Tu deka mai ubah ngagai bagi menua tunga ke atas Sarawak lebih agi Lawas enggau Limbang.

“Perintah Sarawak deka mantu dalam nyukung nyendiaka perengka guna ke bukai nyengkaum pengkalan pemansang,” ku iya.

Tu deka mungkal 1,000 pengawa puang lalu enti mujur, tu deka mai pemansang ngagai selampur Sarawak, ku iya nambah.

Sama ngulu pengawa nyain sempekat tu Sapit Kepala Menteri ti mega nyadi Menteri Industri enggau Pemansang Pengawa sereta Menteri Kedua Pemansang Nengeri enggau Pengeraja Datuk Amar Awang Tengah Alu Hasan, Menteri Muda Pemansang Industri, Malcolm Mussen, Pemangku Sekretari Nengeri Sarawak Datuk Jaul Samion, Sapit Sekretari Perintah Nengeri Datu Mohammad Abu Bakar Marzuki, Presiden Beijing Beca Sci-Tech Co.,Ltd., Hao Ling, sereta Sapit Presiden Sinopec Engineering Incorporation, Zhao Xiangdong.