Konsep demokrasyen enggau penulin lagu Iban

Ngaga lagu baka kitai ke meli tikit loteri. Enti mujur tentu mua tampak bebendang gaga tang enti enda mujur tau ngasuh asa ‘Engkerecham Chuka’ munyiku lagu Rickie Andrewson.

Enda ulih nyalah sapa-sapa laban nya bepanggai ba nasit enggau jereki.

Konsep bebeli tikit mega bedau temu untung enggau rugi laban sigi baka nya mih konsep bejudi.

Pengidup kitai mega tau disema baka bejudi tauka untung rugi sigi udah tuah diri.

Betemu baru kitai ba ruang pemerindang ke minggu tu. Tang serak tu kitai begulai enggau raban Delima Band; siti band ti baru ngangkatka diri di Bandaraya Kuching.

Band tu ditumbuhka dalam taun 2018 nyin suba. Lima iku raban Delima Band nya Frankie (vokalis), Douglas (keyboard), Guil Mat (gitar), Samuel (bass) enggau Wessly (drumer).

Raban Delima Band

Lagu Putus Pengerindu

Tujuh iti lagu Delima Band dirikod sida ba studio Kaban Music Production (KMP).

Komposer enggau pemuzik ke mantu sida sebuat nembuka album tu nya gitaris Jumphull Mordoc, Hairee Francis enggau Douglas.

Tujuh iti lagu ke berentak balada, slow rock enggau joget nya Putus Pengerindu, Sulu Semampai Sayau, Bungai Ukai Setangkai, Bujang Belelang, Joget Betunggang Lupong, Pengerindu Kedai Kopi enggau Besabar Nganti ke bepadu nyawa enggau Eyqa Saiful.

Lagu Putus Pengerindu udah suah dipasang ba churung radio Catsfm.

Ditanya naka ni pengarap iya ba album Delima Band kelebih agi ba lagu Putus Pengerindu, Frankie ke ngembuan sada nyawa tauka ti tinggi madah lagu sida sebaka mega enggau lagu artis ke bukai.

“Terus terang aku madah lagu ti dipilih kami ba album tu digaga enggau chukup penyimat sereta penyeremat.

Iya ukai digaga chara berumban tegal deka nembuka album pia aja.

Iya badas didinga ke semua orang. Muzik kami mega digaga pemuzik ti chukup landik iya nya Jumphull enggau Hairee Francis.

Seduai tu mega mayuh udah ngaga muzik ke artis bukai. Aku arap lagu kami ari Deima Band diterima peminat lagu Iban sebaka mega enggau sida ti nerima lagu artis bukai”, ku Frankie ke mega siku ari orang ti ngempu Riverview Station BBQ & Grill di Kuching.

MERINDANG …Delima Band benung merindang ba sebengkah palan di mengeri tu.

Iya ti bendar raban band Delima Band bisi batang pengawa kediri empu.

Belagu kenu ku sida sebuat semina dikena sida merindang diri sereta kena sida bekaul enggau orang. “Diatu kami sebuat kala diundang merindang ba sekeda endur kelebih agi ba rumah asap enggau cafe di Bandaraya Kuching.

Ba endur tauka tempat ti semak, kami sebuat sigi nadai penanggul laban abis merindang kami ulih mulaika diri baru lalu gawa baru ga hari siti.

Terima kasih ngaga palan pemerindang ti udah kala ngambi
kami belagu,”ku Frankie.

Industri muzik Iban majak mansang beserumba enggau penatai artis enggau lagu baru.

Penatai artis baru diatu nadai sekat laban sapa-sapa ulih nyadi artis rikot.

Kebuah pia sapa bisi duit enggau penemu ulih ngaga single tauka album penuh kediri, ku iya.

ARAP TERUS MUJUR…Delima Band meri terima kasih ngagai semua peminat ke seruran nyukung penatai sida dalam industri muzik lagu Iban.

Konsep demokrasyen

Tu mih konsep demokrasyen ba industri muzik kitai Iban. “Nyau majak mayuh genre muzik kitai Iban.

Baka nya mega penanyi baru. Sida ke biak lebih kreatif ba pekara muzik enggau lagu sida.

Kebuah pia laban sida ulih meda mayuh agi utai nengah media rama lebih agi ati youtube.

Sida mega ulih belajar enggau jampat. Aku arap lagu enggau muzik kitai Iban majak nambah ari segi kualiti.

Semina ngena chara nya nembiak rebak baru lebih tetarit ati enggau lagu Iban”, ku Frankie sekali agi bekunsika penemu diri.

Kitai sama arapka muzik enggau lagu Iban ukai semina betambah ari pemayuh iya tang betambah ari segi kualiti.

Siti ari jalai nyungkak kualiti lagu Iban nya ngena chara ngaga lagu ti lebih kreatif lalu enda kelalu jauh bebida ari muzik bansa bukai.

Taja pan pia, lagu Iban mega patut ngetanka identiti enggau penulin iya ari segi jaku Iban ti standard, gaya enggau daya idup Iban ti bendar sereta ngurangka “elemen” enggau “unsur” tiru ari orang bansa bukai.

Reti nya kitai patut ngetanka sera asal kitai Iban laban kitai Iban empu ti bempu lagu nya.

Terima kasih ngagai kita ti nyukung Delima Band ari ngelama tu ti udah.

“Ngena peluang tu aku meri besai terima kasih ngagai dj radio, raban pemberita, kaban facebook, Kaban Music Production (KMP), palan pemerindang sereta enggau semua ti udah nyukung kami.

Begulai sejalai mih kitai ba industri lalu gaga mih muzil enggau lagu enggau naka penau diri’, ku Frankie ngujungka randau.