Konteriktor Bumiputera mayuh projek

KUCHING: Pedagang Bumiputera Sarawak kelebih agi bala konteriktor ngempu peluang besai ngaul diri dalam pejalai projek infrastruktur ti diperambu perintah ba Langgur Malaysia Lumpar ke-12 (RMK12).

Nitihka Kepala Menteri Datuk Patinggi Abang Johari Tun Openg, perintah nengeri deka ngagaihka sebagi ari kereja bagi tiap projek nyengkaum projek besai ungkup konteriktor Bumiputera.

“Ambika chunto projek jalai enggau jematan, sebagi ari kereja nya kitai deka bagi kediri ungkup konteriktor Bumiputera ke alai kereja besai deka digaga konteriktor bukai,” ku iya beserimbai enggau Pengerami Anugerah Orang Dagang Bumiputera Sarawak 2019 ba sebuah hotel tebilang ditu, kemari.

Nya alai iya madahka, iya udah ngerah Opis Sekretari Wang Nengeri ngena pelasar baru ngambika konteriktor Bumiputera bulih projek-projek ti deka digaga perintah nengeri.

Ku iya, laban RMK-12, mayuh projek insfrastruktur udah diperambu nyengkaum ba baruh Projek Transformasyen Menua Pesisir (RTP).

Abang Johari madah ungkup RTP aja, perintah nengeri udah ngagaihka enda kurang RM500 juta setaun, sekaligus berega RM2.5 billion dalam timpuh lima taun.

“Projek udah bisi semina konteriktor Bumiputera patut nyeruri diri ari sukut pematih teknikal enggau pengatur.
“Tu semina sebagi ari projek mit, bedau agi projek besai baka jalai menua pesisir, insfrastruktur enggau ke bukai,” ku iya.

Nangkan nya, iya madahka perintah nengeri nengah Sarawak Energy Berhad (SEB) benung berunding ngatur kerejasama enggau serikat utiliti ari Indonesia bagi ngemansangka kuasa karan di Kalimantan.

Ku iya pemansang tu asil ari pengawa mindahka indu opis menua Indonesia ari Jakarta ngagai Kalimantan.
Ba maya tu, Sarawak udah ngaga kerejasama rat enggau Kalimantan Barat bagi tuju mengeksport kuasa karan kin.

“Enti tu nyadi, kitai deka nyadi pemain dalam grid kuasa karan di Borneo lalu tu deka meri peluang dagang ngagai orang Bumiputera,” ku iya.

Sama datai Sapit Kepala Menteri ti mega Menteri Dagang Entarabansa enggau Industri, Terminal enggau Pemansang Orang Dagang Datuk Amar Awang Tengah Ali Hasan, Speaker Dun Datuk Amar Mohd Asfia Awang Nassar, Presiden Dewan Usahawan Bumiputera Sarawak (DUBS) Datuk Abang Helmi Tan Sri Ikhwan enggau Ketuai Dewanita DUBS Sarawak Juita Drap.