MIRI: Konvoi Kembara Merdeka 60 Taun Sarawak ti datai ba Miri kena 29 Mei tu tadi ari Limbang deka nampung pejalai ngagai Pelilih Subis, Beluru, Telang Usan enggau Marudi.

Pegawai Opis Pelilih Miri, Siti Rohanie madah, pengudah tembu renggat konvoi di lima pelilih Miri, konvoi nya deka nampung pejalai ngagai palan bukai iya nya Bintulu kena 10 June.

Premier Sarawak, Datuk Patinggi Tan Sri Abang Johari Tun Openg deka ngulu konvoi tu ari Miri ngagai Bintulu berengkah 10 pagi, 10 June di Stadium Bandaraya Miri.

Dulu ari nya, konvoi nya deka bekejang ari Universiti Curtin Sarawak, Pantai Luak Explaned, Coco Cabana enggau ngagai Kompleks Islam Sarawak (KIS) Miri.

Konvoi nya ngena entukar enggau 60 buah motosikal bekuasa tinggi betuai ke iya empu kelai sukung.

“Konvoi tu deka bejalai ngagai Pelilih Subis berengkah pagila ditangkan pelilih bukai ba Bagi Menua Miri sebedau mindah ngagai Bintulu kena 10 June begulai enggau Premier Sarawak,” terang iya.

Konvoi nya mega diiring Polis DiRaja Malaysia (PDRM), Opis Pengangkut Jalai (JPJ) enggau ejensi perintah bekaul.

Ba Pengerami 60 Taun Sarawak Merdeka taun tu, Perintah Sarawak udah ngelanggur bemacham projek dipejalai ba selampur bagi menua di Sarawak nyengkaum Miri.

Nya mega pelasar ngenatai inisiatif Perintah Sarawak nyapai pengelantang, pengelikun enggau penyerakup nipakka pemansang meruan kelebih agi ba Bagi Menua Miri.

Kelimpah ari nya, tu mega nyadi inisiatif narak semangat pemereti ati, penaluk ngagai menua sereta negap semangat beserakup entara rayat Sarawak.

Pengerami tu chukup semak ba ati semua rayat Sarawak nyengkaum rayat ba Bagi Menua Miri.

Nya mega naratif pejalai pemansang Sarawak ti udah napi bemacham pemar enggau penguji ngambi mansang enggau nyendia pelasar ti chukup manah ngambi diasai semua kitai nyentuk diatu.

Sama datai Residen Miri, Jamalie Busri.