Kordinator Parlimen: RM500,000 setaun ungkup pemansang

KUCHING: Chairman Kaunsil Pengatur Pemansang Nengeri (MTPNg) Perintah Besai, Baru Bian udah nyiri 19 iku Kordinator Parlimen ungkup sitak parlimen sida empu ba Sarawak.

Baru ke mega Menteri Kereja Raya Malaysia madahka diri besai amat pengandal ngagai sida betubuh 19 iku ke dipadu mangku pengawa nya.

“Kita ke udah dipilih tu dilempaika pengandal nentuka program enggau projek di baruh Atur Pemansang Lima Taun Perintah Besai dipejalai nitihka pematut.

“Bala kita mega deka ngarika Perintah Pakatan Harapan ba penuduk parlimen dipegai pengari penyakal.

“Nya alai kitai andal amat sida tu deka mai enggau bejalaika polisi Perintah Besai kelimpah ngenegapka kaul entara perintah enggau rayat,” ku iya.

Baru mansutka jaku tu lebuh bejaku ba Pengawa Nyuaka Surat Chiri Kordinator Parlimen Nengeri Sarawak diatur ba sebuah hotel tebilang ditu tadi.

Ungkup penerang, Kordinator Parlimen ti ngarika sitak sida empu deka nerima Agih Belanja Khas Menteri Besai penyampau RM500,000 setaun.

Tabi puji ngagai semua 19 iku sida ke udah diberi pengandal bejalaika pengawa nyadi Kordinator Parlimen lalu selamat bejalaika pangku pengawa.

Suara Sarawak