KUCHING: Sistem Transit Aliran Autonomi (ART) deka mantu ngurang penanggul jalai alun sekut ba Kota Samarahan kelebih agi maya jam pulai enggau nurun gawa.
Tuai Pegawai Eksekutif Sarawak Metro, Mazli Mustaffa madah, kebuah pia laban pelilih nya disadang deka majak maju.
“Nya alai, nadai inisiatif tunggal ulih mutar penanggul tu laban majak mayuh genturung pendiau ditumbuhka ba Kota Samarahan, penyampau entukar pen deka nambah.
“Taja pen arung jalai alun ditambah nyadi lima arung ba genap sisi pen enda ulih mutar penanggul tu.
“Pekara tu beguna chara mutar ba renggat besai lalu pengawa ngaga ART nyadi pemutus ti engkeman dikena ngurang penanggul jalai alun sekut ba Kota Samarahan,” ku iya.
Mazli mansutka jaku nya rambau nerima penemuai basa ari raban Suara Sarawak enggau New Sarawak Tribune ba opis sida ba Ariva Gateway Kuching ditu, sehari tu.
Taja pia, iya madah, penanggul deka ditapi sekali ke perengka pengangkut mensia mayuh nya deka dikena mensia mayuh tauka enda.
Ku iya, bemacham inisiatif patut diambi dikena meransang mensia mayuh ngena perengka pengangkut mensia mayuh nya sereta enda bepanggai penuh ba entukar diri empu dikena bejalaika pengawa nyengkaum nurun gawa.
Mazli madah, sekeda inisiatif dipejalaika Sarawak Metro dikena mutar penanggul nya baka nyendia servis bas pengantara nyadi chara lama dikena meri pemaik ngagai penumpang nuju stesyen ART.
Iya mega madah, Sarawak Metro benung nyerungkai sekeda strategi bukai dikena nambahka tikas pengulih nya.
