KPASS deka chakah ngangkatka seni pencha

SIBU: Kelab Pencha Ajat Spring Sibu (KPASS) udah dikemendar Opis Rejister Gerempung (ROS) kena 31 Oktober tu tadi.

Sekretari iya,  Regina Rantai madah sebedau tu sida kala nganjung peminta nengah online ngagai EROSES lalu enggau naka ulih nyendiaka dokumen ti diguna.

Regina tu siku indai ke chakah matau sebarang aktiviti beguru anak iya enggau kelab tu kenyau taun 2017.

“Terima kasih ngagai Petara laban udah mendingka sampi aku kenyau bulan Mei taun tu udah nyadi nyata.

“Aku mega meri besai terima kasih ngagai pemesai EROSES Kuching laban udah meri kerejasama sereta terima kasih ngagai semua 11 raban komiti kelab tu laban udah ngemujur pengawa ngerejister,” ku iya.

KPASS diketuai (Chairman) John Maju seraya Williejam Bisa nyadi Sapit Chairman ditangkan Regina (Sekretari), James Raphael Lanting (Penulung Sekretari), Jeferi Chaong (Tukang Wang) enggau Ludan Sato (Pemantu Tukang Wang).

Entara kaban komiti ti dichiri tu iya nya Alfred Madang, Changan Ugah, Manjan Maju, Jebeni Pangkau enggau Stanley Langan.

Nangkan nya ku John, KPASS ngembuan juluk deka ngiri penemu bepencha enggau tanda asal bansa Iban sereta ngatur pengawa belajar enggau latih ngagai raban dalam kelab tu.

“Kami mega deka nempa nembiak enggau pengajar pencha sereta tanda asal, bedisplin enggau bisi kualiti kelimpah ngemansangka main asal enggau seni ngetanka diri bansa Iban enggau etnik Dayak ke bukai,” ku iya nerang silik.

Nambahka nya ku iya, KPASS mega deka nyendiaka ajar bepencha enggau tanda asal sereta latih ngagai bala pengajar ba sekula.

“Diatu, KPASS bisi 11 Guro ti diajar aku lalu dichiri maya Pengawa Tambak Guro nitihka adat Iban.

“Pengudah tembu beguru, sida tu udah dichiri enggau bulih gelar Guro Tapang Bekumbai, Guro Dulang Sempandai, Guro Lang Ngindang, Guro Cherira, Guro Tuntong Lang, Guro Ijau Lelayang, Guro Menaul Nyanggai, Guro Tempan Besi, Guro Tutu Penda, Guro Gemuring Gading enggau Guro Tuntung Menyarung.

“Aku ngarapka bala anak diajar aku tu deka ngena mayuh pengelandik ti udah diajar aku lalu anang salah ngena pengelandik dikembuan,” ku iya ke suah dikangau Guro John Siang.