KPDHEP mesti nentuka barang subsidi datai di menua ulu

KUCHING: Opis Menteri Dagang Dalam Menua enggau Pekara Penguna (KPDNHEP) mesti nentuka bekal barang subsidi tauka barang ditagang datai ngagai rayat ba menua ulu sarawak.

Kaban Parlimen Hulu Rajang, Datuk Wilson Ugak Kumbong madahka pekara tu beduduk ari mayuh barang nya enda datai ngagai penguna ba menua ulu.

“Ambika chunto, enti 100 tung gis petroleum (LPG) ti udah dikemendar diidar tang datai ba rumah panjai semina 40 tung aja, laluh 60 tung agi enda nemu kini penunga.

“Nya kebuah, KPDNHEP mesti neritka operasyen matau enggau neritka adat ngambi meri pengandal ngagai rayat,” ku Ugak.
Ugak mansutka jaku nya ba jurai Bajet 2021 renggat Komiti KPDNHEP ba Aum Parlimen, ditu ensanus.

Berebak enggau nya, iya minta Opis Menteri Dagang Dalam Menua enggau Pekara Penguna (KPDNHEP) numbuhka opis mit ba Pelilih Belaga.

Ku iya, opis mit KPDNHEP beguna amat ba pelilih nya ngambi ngemuntangka pengawa mensia mayuh ba menua ulu betemu enggau piak opis menteri.

Pia mega, pemisi opis mit tu nentuka sida enda ibuh bejalai jauh ari rumah panjai sida.

Ugak mega irauka raban bukai ti nadai beempu tanggung pengawa nyadi orang tengah ti beambi ulih ba barang subsidi enggau nyual barang nya ngagai rayat menua sepiak.

Nya alai, iya madahka KPDNHEP nengah pampang iya ba genap pelilih mesti bekerejasama rat enggau Opis Pelilih, Opis Kaban Parlimen tauka Opis Residen di Sarawak nnetuka sida patut nerima barang dalam skim nya.

KPDNHEP sedia ngagihka belanja RM200 juta taun baru ungkup Program Ngidar Barang Diguna, LPG enggau Community Drumming ngagai komuniti ba menua pesisir bebelika barang diguna sida.

Nengah inisiatif nya, perintah mayar ungkus perengka pengangkut ari pemekal ngagai menua ulu ti dipilih mekalka tujuh barang subsidi ngambi mantu ngelempungka tating penusah rayat.

Suara Sarawak