KUCHING: Opis Menteri Pengawa Bekebun enggau Komoditi Malaysia (KPK) sedia nanggam kerejasama enggau United Kingdom (UK) ba pengawa komoditi ungkup ngerembaika agi dagang kededua menua.
Sapit Menteri Besai ti mega Menteri KPK, Datuk Seri Fadillah Yusof madah, sida ngelaluka semua aum bekaul pekara tu lalu nyukung penama UK dalam Sempekat Komprehensif enggau Progresif bagi Perkongsian Trans-Pasifik (CPTPP).
“Sekretari Dagang UK Kemi Badenoch sebedau tu nengah sebengkah penerang ningkah penemu pasal pengawa munas kampung ngaul sektor sawit laban minyak nya siti ari produk ti produktif, bepengerai lalu diguna ba serata dunya.
“Nya alai, kitai ngelalu penerang ari UK nya lalu sedia bekerejasama ngagai sida ba pengawa komoditi kelimpah chakah agi ngatur dagang entara dua menua,” ku iya.
Fadillah bejaku munyi nya lebuh ditanya pemberita ba Program Ngagihka Bubur Kachang ti diatur Komiti Pemansang enggau Pengelikun Genturung Pendiau (JKKK) Enam Taman Kuching di Surau Al-Hidayah, Taman Sejoli, Petra Jaya, ditu tadi.
Ku iya, sektor Minyak Sawit Tegap Malaysia diatu ba penuduk pemadu manah dikena nangkup peminta penguna ari serata menua UK enggau Eropah nuju alternatif minyak makai ti meruan agi.
