KPLB merambu randau begulai enggau Media

KUALA LUMPUR: Opie Menteri Pemansang Menua Pesisir (KPLB) merambu ngatur randau begulai enggau media taun baru dikena ngempung penemu ngemanahka agi servis opis menteri nya, ku menteri iya, Datuk Seri Rina Mohd Harun.

Iya madah, opis menteri iya mega deka suah agi ngatur pejalai gawa ngagai renggat baruh ngambi ngerembaika inisiatif opis menteri nya ngagai komuniti enggau raban diselinting.

“Enti ulih, taun baru kami deka ngatur randau minta penemu ari raban media baka ni opis menteri tu ulih ngemanahka agi servis kelebih agi ngagai rayat.

“Kami mega deka ngatur mayuh program betemu enggau rayat, suah agi nurun gawa ngagai renggat baruh enggau tuju ngerembaika agi bungkur inisiatif KPLB ngagai komuniti enggau raban diselinting,” ku iya lebuh bejaku ba Malam Media opis menteri nya, ditu malam tadi.

Dikena ngenang jasa enggau sukung tegut raban media, Ketuai Srikandi Parti Pribumi Bersatu Malaysia (Bersatu) nya madahka opis menteri iya deka berengkah meri Anugerah Media Pengelantang Menua Pesisir taun baru kelai ngaku ripot enggau asil keranjai jari piak media lebuh ngaga ripot aktiviti opis menteri nya.

Ku Rina, bisi empat anugerah besai deka dipekit iya nya Anugerah Media Chelak Ungkup Akhbar enggau Magazine, Anugerah Media Elektornik Ungkup TV enggau Radio, Anugerah Online Ungkup Artikel enggau Video sereta Anugerah Fotografi Pemadu Manah. – BERNAMA.