KPM dipinta jampat mutar isu sekula repuk di Saratok – Ali Biju

SARATOK: Sedarka penanggul infrastruktur nyadi pugu penekul pemansang pelajar enggau sekula di menua, MP Saratok Ali Biju udah ngapil Opis Menteri Pelajar Malaysia (KPM) ngerumban pengawa tu.

Ku Ali ke mega Adun Krian, isu sekula repuk tu endang patut diperatika raban bekaul nentuka pemansang sekula enda ditekul sereta bala nembiak ulih bejalar ba rampa ti meruan agi.

“Kitai sedarka pekara tu lalu suah udah nandu peminta nyeleti sekula repuk di Sarawak kelebih agi di menua dipegai aku iya nya SMK Saratok enggau SMK Klaka, Roban tu.

“Pengelantang tu ukai semina ungkup bala nembiak aja tang nyengkaum bala pengajar sereta bala staf sekula bukai mega laban kitai nemu udah lama ngasaika pemerinsa enggau penyuntuk nadai penyikap perengka guna pemun tu,” ku Ali.

Ali mansutka jaku tu lebuh bejadika Pengawa Ngintu Hari Pengajar SMK Klaka, Roban di Datarang Sri Tebujang ditu, apin lama ke udah.

NYINUK… Bala nembiak SMK Klaka, Roban meri perati ba pekara disebut Ali Biju lebuh bejaku bejadika Pengawa Ngintu Hari Pengajar.

Nya kebuah ku Ali, iya keran amat ngangau sereta ngemai raban ari KPM bejalai ngabas ngagai renggat baruh, meda gaya pendiau sekula di menua nya.

“Tetiap kali bisi awak limpang berandau, aku endang nandu pekara tu ngambi sida deka kiruh enggau bisi ati sinuka penusah ditapi kitai di menua tu,” ku Ali madah nyemetak.

Belanja sepenyampau RM40,000 diagih ungkup sekula nya ku Ali nyadi belanja dikena tekala nya kena nyeleti begunan sekula repuk nyengkaum nukar dinding, geladak enggau ke bukai nyengkaum buding nembiak.

“Kereban tambah bukai baka jemari, mija, katil, tilam enggau bangku deka diberi udah tu lalu tu ngayanka pengeran perintah nyendiaka rampa ngajar enggau belajar ti menyana ungkup pengelantang semua,” ku iya.

Nangkan nya ku Ali, iya temegah ati meda penyapai sekula ba pemutus peresa majak manah sereta ngayanka gaya pengawa nyulut bisi dikembuan komuniti ti ngembuan runding dekaka pemansang.

KENANG… Ali nerima tepa ari Prinsipal Iman Haji Joni rambau Pengawa Ngintu Hari Pengajar ditu, apin lama ke udah.

Bala nembiak patut ransing agi ngiri penemu dikena nyikap diri napi jeman teknologi kemaya hari, ku Ali meransang.

“Kitai nemu diatu jeman semua orang bekenaka teknologi tang kita ke nembiak patut nemu enggau landik magi jam diri.

“Kena teknologi ba tuju pengawa ti bisi asil baka ngiga penerang pasal pekara pelajar, bekunsika penemu ti ulih nempa pemaik enggau pemansang sekula,” ku Ali ngelalau.

Berebak enggau nya agih belanja penyampau RM20,000 diberi ngagai sekula dikena sida ngatur aktiviti sepanjai taun.

Sama datai Prinsipal Iman Haji Joni, bala pengajar enggau bala nembiak sekula nya.

NGELALAU… Ali nibarka jaku lalau ngagai bala nembiak.