KUCHING: Pengudah ngemata gaya pemadu baru, Opis Menteri Pelajar Malaysia (KPM) ngemendarka baru pengawa bejalaika aktiviti luar ti dilanjar sebedau tu ketegal gaya hari balat angat.

Sapit Tuai Direktor Pelajar, Dr Norisah Suhaili nengah surat padah enggau atur malin madah, pemendar nya berengkah diterit kena 6 June (Hari Dua).

“KPM udah ngemendarka baru pengawa bejalaika aktiviti luar sereta nyamin pengawa ngintu pengelantang, pengerai enggau pengelikun nembiak, pengajar sereta raban pengatur maya napi hari angat.

“Pengawa meri pemendar tu bepelasar ke atur malin bejalaika aktiviti luar institusyen pelajar ba baruh KPM.

“Pekara tu beguna amat ngambi atur ti engkeman ulih diambi dikena ngintu pengelantang, pengerai enggau pengelikun ba pengawa nagang empas ari gaya hari angat lebuh bejalaika aktiviti luar bilik kelas,” ku iya sehari tu.

Iya nyemetak madah, atur malin nya patut dititih dikena nyeliah empas ari gaya hari angat ti ulih ngeruga pengerai baka hipertermia tauka strok haba enggau dehidrasyen.

Dulu ari nya kena 5 Mei tu tadi, KPM udah ngeluarka surat padah bekaul pengawa ngelanjar aktiviti luar dikena nyeliah sebarang empas ari gaya hari ti enda tentu ngagai pengerai enggau pengelikun nembiak, pengajar sereta raban pengatur.

KPM madah, tagang nya nyengkaum pengawa neresa babas, kawad, lumba, main, bemarin sereta aktiviti ngajar enggau belajar (PdP) ba luar bilik kelas.

Nya alai, Atur Malin Aktiviti Luar Institusyen ba baruh KPM netap aktiviti luar bilik kelas ulih diatur enti suhu kurang ari 35 darjah selsius sereta semampai bejaga.

Bala nembiak enda tau dipejal ngambi bagi ba aktiviti luar bilik kelas sereta bisi pemendar ari apai indai.