KRAF JARI: 1001 pemaik, penguntung

KUCHING: Tau jari enggau landik nengkebang nyadi pengelebih ngagai sida ti angkunka pengawa ngaga kraf jari.

Entara kraf jari nerima peminta tinggi ba makit diatu iya nya ari manik, kain sulam, tenun, begagaka kereban ngepan indu enggau lelaki sereta mayuh ke bukai.

Tinjau penemu Suara Sarawak diambi ari sekeda raban ti ngemeranka pengawa nya tebal agi setujuka kraf jari mujur nyungkak ekonomi ba ruang bilik sida sereta ngemai mayuh pemaik bukai sekalika ari bekunsika penemu, pekara rama enggau ngedutka kaul bebakih.

Gloria Paula Sebia, 28 taun, ari Rumah Dik, Batu 8 di Jalai Oya Sibu madah, bemacham penemu diiri sepanjai ngulu kelas, seminar enggau kus kelimpah ati diri belajar nusuk manik.

“Ukai semina orang ngembuan penemu enggau pengelandik enti enda ari belajar, puh enggau liat ati, landik nengkebang ari penemu dipelajar ngambika asil manik kitai dipeda nyelai sereta alus.

TAU JARI… Louis benung kiruh ngaga sugu tinggi

“Begagaka kraf jari tu mega tau ngasuh ati kitai rindang, runding mega nadai limpang ke bukai kelebih agi ngereja ulah enda menuku ti tau ngeruga pengelantang ruang bilik enggau jereki kitai,” ku Gloria meri penemu iya.

Sepenemu enggau Gloria, Louis Kelaman, 32 taun ari Rumah Badin Sungai Majau, Kanowit madahka raban diselinting baka indai tunggal enggau sida ti datai ari ruang bilik seranta mujur amat ngangkatka tikas idup sida ari asil kraf jari tu.

“Juluk aku nampung enggau ngiri penemu ngagai raban tu laban dekaka sida bisi penatai pemisi tambah ba ruang bilik, besaup nyungkak ekonomi ari pengawa ngaga sugu tinggi, kain buriek enggau pengelandik bukai.

“Pengawa baka tu mega ulih ngerapitka sintal kaul begulai bebaik enggau pangan diri seraya ngetanka pesaka asal aki ini kelebih agi ngaul kereban ngepan asal kitai bansa Iban di menua tu,” ku Louis madah nyemetak.

Ku penemu Mary Ainie, 42 taun, peranak asal Sebauh di Bintulu, ari pengawa pengelandik jari tu kitai ulih bekunsika penemu kelebih agi ba pengawa sulam lalu diatu baru ngepunka pengawa ngaga kain buriek.

MUJUR… Gloria mandangka asil manik ti ditusuk iya empu.

“Bai ati angkun seraya ngisi jam pengudah lepa ngintu pengawa di rumah, kami sebakih numbuhka siti raban ba Whatsapp nyadika pelasar bekunsi, bejurai enggau randau pemansang ungkup ruang bilik.

“Chukup manah penemu dibantai bala bakih dataika kami bela maju enggau mujur ba dagang kraf jari, kelimpah nerima peransang ari apai tuai enggau diri sebilik ke bukai.

“Nya kebuah aku setujuka penemu kraf jari tu ulih nyungkak ekonomi sereta ngemai mayuh pemaik ngagai kitai empu kelimpah nyadi ayam jari maya betunga ujung minggu, bejalai ngusung pangan diri,” ku Mary nyimpul penemu diri.

Ari lansa penemu dikunsi raban ti angkun enggau ngemeranka dagang kraf jari tu, kitai tau ngumbai mayuh agi pemaik enggau pengelebih teulihka pemujur ba pengawa tu ari ke masau jam berandauka pekara nadai bebatang.

Nya kebuah bemacham inisiatif dipejalai raban opis enggau ejensi di menua tu dikena meransang kitai maju ba dagang kraf jari nengah atur program, karnival, kus, bengkel enggau aktiviti bukai ngaul pengawa tu.

ALUS… Mary nembuka sulam ti diudar bala bakih.