KANOWIT: Kreativiti Elyana Anak Ricky, mujur narit ati mensia mayuh teperindang sereta jenuh beratika pemanah video kreatif ke digaga iya ba renggat kepenudi Pekit Kumang Online 2021 Trofi YB Datuk Ali Biju tu tadi.

Pemenggi gelar Lulong tu baru beumur 19 taun ari Rumah Kendawang, Sungai Tuah ditu entara beratus iku sida ti nguji masuk pekit nya lalu iya mujur menggi gelar Lulong.

Iya madahka diri endang rindu macha enggau ngereja pengawa ba tanah, nulung sida sebilik gawa ba kebun lebuh ke bisi ba rumah panjai.

“Laban agi nampung pelajar ba Pom Enam ba SMK Rosli Dhoby, Sibu din lalu diatu ngulu kelas chara tali arus tauka online, dia aku magi jam ungkup belajar, nulung sida apai gawa enggau pengawa ke bukai.

“Pia mega lebuh ngambi gambar, ngerikod video catwalk enggau video kreatif lebuh bepekit, aku naka ulih ngereja pengawa nya dataika ati tepantup, enggai mega ngudahka pengawa,” ku iya lebuh dirandau Suara Sarawak.

Endu Elyana madah, terubah meda jaku tesau pasal pekit nya nengah Facebook, iya empu lalu tekuing runding deka nguji enggau orang ngeruh ai.

“Aku meh keterubah orang meransang diri empu tama pekit tu. Sepengudah aku tu andal ka diri empu tama, aku pan lalu beberita ke utai tu ngagai kami sebilik.

“Sida pan nadai tagang tang pungka sida meransang aku ngambi aku bebendar enti ka tama enggau orang bepekit.

“Endang nadai orang bukai, sigi kami sebilik meh keterubah orang ti meransang aku enggau bepekit, tama pekit kumang tu,” ku iya madah terang.

NIAT NGERUH AI

Nampung randau ke ujung agi, enti iya nyebut lagi bisi munyika bula, ke alai iya tama pekit nya laban sigi rindu enggau orang ngeruh ai aja, munyi ku jaku uti kitai Iban.

Endang nadai disagam ati tudah Elyana iya ulih nempa pemujur dataika dipilih masuk renggat kepenudi, sepuluh iku indu dara mekit pangan diri, berebutka gelar Kumang Online 2021.

“Senentang pengawa nyendiaka diri empu, nadai entu besediaka utai ga tudah diri.

“Ari pun renggat keterubah 100 pemekit suba, aku semina ngerasuk ni bagi kereban ngepan ti bisi aja, enda penuh.

“Begambar pan pia aja lalu dianjung ngagai sida ke ngatur pekit tu. Nadai disadang aku ulih tama renggat kedua, nyadi siku ari 50 pemekit diundi mensia mayuh.

“Tang seninjik ulih tama renggat kedua nya, aku pan lalu berengkah ngatur ni bagi utai ti ka diaduka aku ba video catwalk, baka ti dipinta bala komiti pengatur pekit.

“Ari nya tadi mega, berekat semua pengelandik ti bisi dipelajarka aku ba sekula, ulih ga dikena aku mimit dikena mulah nengkebang aku empu ensumbar.

“Aku pan lalu begadai-gadai ngingatka baru sekeda main asal ti ulih dibai aku.

“Ari senentang nyendiaka diri amat-amat, aku sigi nadai laban aku agi bebalut enggau tanggung pengawa nyadi nembiak sekula,” terang anak dara Ricky Kendawang enggau Lampang Udup nyentuk.

MAI ATI BERANI

Elyana madah, nya meh pekit keterubah dipasuk iya, kelang alai iya nyabung pemajik, penau enggau pengelandik diri empu.

“Bula enti aku madah nadai asai takut, nangi sereta malu. Bepun ari nganjung diri ngagai renggat keterubah, aku udah bisi asai nangi, rawan.

“Dalam ati aku semampai betanya; baka ni peragam ati orang mayuh ngagai aku?

“Ulih ke enda aku tu enggau orang besemekih enti masuk renggat kedua ila ke bisi 50 pemekit?

“Kada enda mayuh agi kini orang ti bisi pemajik, peneleba sereta pengelandik senentang adat enggau main asal Iban?

“Dia runding aku semampai mutap-mutap bejaku kediri. Bisi ga maya aku nangi nelihka ati sida ti udah andal ngasuh aku nurun bepekit.

“Nya alai, enggau naka ulih ngeringka ati diri sereta besampi ngarapka penujur tau datai sangkai terengkah ba mua aku,” ku Elyana bekunsika pengasai ati iya ngelama tu.

Iya madah, bepun ari orang deka madahka pemutus ni bagi pemekit ti deka tama renggat kepenudi, udah nadai temu tunga asai ati, mengkang kesal di jungkal dada.

Pansut pemutus madahka iya tu tadi tepilih dalam rintai pemekit ti tama renggat kepenudi, berasai gaga di kandang dada laban orang agi andalka iya enggau besemekih dalam pekit nya.

“Bisi berasai lempung di ruang jantung laban aku bulih peluang dikena aku mai adat kitai Iban pansut ngagai mua mayuh.

“Sigi lama udah dianti aku ka nguji ngerembaika pengelandik ti mimit tu ngambi bala nembiak tau nitih, nunda enggau besaup ngemeranka adat enggau main asal bansa kitai.

“Pia mega, aku mupuk kesal laban aku nemu orang ti enggau aku tama renggat kepenudi tu sigi endang landik magang.

“Sekeda dipeda aku sida ti tama renggat kepenudi tu endang sigi udah bisi peneleba enggau pekit kumang, tambah mega tikas pelajar sida mayuh tinggi ari aku.

“Enggau nya aku lalu ngering diri, besikapka kereban sereta penemu dikena aku ngerandang jalai mekuhka adat sereta main asal kitai Iban.

“Aku chukup beterima kasih ke sukung bala krew aku ti semampai meri jaku pengering ngagai aku ngelama tu,” ku iya nyerita sekeda utai ke nyadi.

MAGI JAM NGATUR PENGAWA

Penguji besai ti ditapi Elyana sekumbang ke enggau bepekit iya nya magi awak iya dikena belajar sereta dikena ngaduka pengawa ba pekit nya.

Baka udah dipadah iya ba pun randau tadi, nyadi nembiak sekula, tanggung pengawa nya endang utai ti dikenuluka iya ari semua pekara.

“Aku bisi kelas ari Hari Satu ngagai Hari Lima, nyadi awak lepa aku endang serekat amat alai endur aku bejalaika pengawa enggau orang bepekit kumang.

“Udah kelas, aku bisi kereja rumah ti patut digaga. Kereja rumah sigi ditembuka dulu sebedau aku ngaduka pengawa pekit kumang tu baka ngaga video tauka belajarka adat enggau main asal,” terang iya silik.

Penanggul lumur dua ti suah nekul iya ku Elyana, arus penyambung tauka line internet rumah panjai sida suah tejanggal, tau bisi lalu nemu lesap tekala nya.

Pekara baka nya ti ngasuh iya tusah deka ngaul diri enggau bala pemekit bukai dalam gerup WhatsApp sida, jarang dipeda ayan enggau ngerandau bala dia.

“Aku tu endang semampai laun nerima penerang pasal pekit laban suah nadai line internet, nyau enda semaya endur nerima tauka malas randau sida.

“Penanggul ketiga, Atur Mindah Betagang (PKP). Ketegal PKP benung terit dipejalai ba menua kitai, kami sebuat enda entu ulih ngambi video ba mayuh endur.

“Kami nemu enggau sedarka PKP tu semitan betagang pandemik ari ngerekai ngagai endur bukai lalu ulih nyeliahka diri kena rampit igi penyakit tu.

“Taja pan mayuh penguji sereta penanggul ti nekul sekumbang bepekit tu, aku enda lemi ati sereta enda mantul ngapa, enggaika lagi aku tu disempamaka orang baka timau jampat midah.

“Berekat ari sukung gerempung bala krew aku, ulih ga aku nembuka video aku ba renggat kedua enggau renggat kepenudi. Puji Tuhan,” ku iya nusui utai kebendar nyadi.

PEMUJUR ARI PENEGAP SUKUNG

Elyana madahka diri chukup beterima kasih ke sukung apai enggau indai iya, sereta bala menyadi; Alfredickson Tawie, Tirza Long, enggau Alvindrickson Lang.

Pia mega ini enggau aki iya, Kendawang Bareng, Dina Bareng, Banun Chabok, Igi Lampung enggau Udup Lampung sereta bala aya enggau ibu.

“Sida meh ke tulang belakang aku maya aku ngemunka diri tama bepekit tu. Kelang kelut enggau aku bibat ngaduka video dikena bepekit.

“Pia mega, aku beterima kasih mega ngagai bala krew aku; Greyson shaddai, Mckoy Akam, Pamella Devi Inchee, Terrence Nyawine, Armelia Philomena, Corina Beja, Helen Renggan enggau Amylia Elizabeth laban udah mayuh nulung enggau aku nembuka video aku kelebih agi ba renggat ti kepenudi.

“Sanggup enggau aku ngaga video datai 2 3 pagi. Sida tu meh orang ke patut dipebasa laban sida mega lelak enggau aku ngaduka video.

“Pia mega terima kasih ke tulung sukung Tuai Rumah Lily Apang enggau Tuai Rumah Joshua Medan laban udah ngemendarka pengawa aku ke begaga video ba palan sida nitihka perambu SOP menua kitai.

“Sida nyukung aku 100 peratus. Aku meri basa ke pemeras sida enggau begagaka video dataika semua utai tembu sereta mujur magang,” ku iya temegah ati laban nerima sukung tegap ari sida nya.

NGEPAN INI

Bepun ari renggat keterubah (100 pemekit), renggat kedua (50 pemekit) dataika renggau kepenudi (sepuluh pemekit) ku Elyana, iya ngerasukka ngepan ini iya empu ke benama Dina Bareng.

Semina maya renggat kedua bisi ditambah iya mimit kereban ngepan ari bala iya benama Greyson Shaddai.

“Pia mega ba renggat kepenudi, ditambah aku penuh mimit enggau kereban ngepan ari Lineker Phil Philip.

“Kereban nya baka sanggul buk, cham sanggul, gerunchong, lampit, selampai belakang enggau perecha.

“Orang ti ngerasuk ke aku sigi kami sebilik laban ti benung PKP enda ulih begelumu mayuh lalu orang luar benung ditagang niki ke rumah panjai,” terang iya.

Nyadi batang pengawa senentang adat enggau main asal kitai Iban sigi bisi dipelajarka Elyana ba sekula suba tang semina mimit aja ulih dikeingat.

Kemayuh agi pekara ngaul adat enggau main asal, iya belajar ari meda orang ba menua sida empu.

“Aku belajar ari aki aku empu laban iya tuai rumah. Iya tuai megai adat ba rumah panjai kami, ari iya meh aku bisi belajar mimit.

“Lebuh bepekit tu mega, orang tuai ti bisi ngajar enggau ngembing aku, narak penemu senentang adat ngau main asal Iban iya nya bala aku Greyson Shaddai enggau aki aku, Ipas Anyau.

“Sida tu meh ti puh ngiring ngembing aku, ngiri penemu, suah endur aku betanya sekumbang bepekit tu tadi,” ku iya lalu tuchum lelegup.

ANAK TI MENTAS

Kelimpah ari ngerengkunka tanggung pengawa nyadi nembiak sekula, Elyana mega semampai ingatka tanggung pengawa nyadi anak.

“Diau ba rumah panjai, siti alai chara pendiau ti enda mayuh orang ulih ngasai laban mayuh orang nembiak diatu nyau mapar gawa ba sebelah mengeri.

“Sekeda pengawa ti dikerinduka aku ba rumah panjai iya nya nulung indai enggau apai bekebun, nurun gawa ba tanah.

“Aku rindang endar enti bebalut enggau ai embun tumu pagi, nyium renggut asap reba ditunu sereta ninga munyi burung ke richah inggap sebelah dan kayu bepakaika buah.

“Aku mega rindu berandau enggau orang tuai pasal adat sereta jerita kelia menya, lebuh duduk ba ruai lemai hari, pengudah tembu ngintu diri.

“Enti bidik, ulih nunga sida ibu enggau ini ti benung kiruh beranyamka tikai, nusuk manik tangu, ngerandau bala aya enggau aki benung ngeraut wi tauka mingkai pemansai.

“Nambahka nya mega, aku rindu begigaka pemakai daun babas lebuh nurun ke tanah begulai enggau apai indai sereta bala menyadi aku.

“Ari nya meh aku masai ngereja pengawa indu rumah panjai lalu meretika adat, siruka pangan diri, bebasaka diri empu enggau sida ke tuai, nemu lebas pengawa ke tau enggau enda tau dikereja.

“Kebuah pia laban sida ke tuai semampai ngajar kami niti enggau nali adat lama ngambi pengidup likun, rumah chelap lindap lalu kitai ulih begulai bebaik enggau diri semenua,” ku Elyana.

MEKUHKA ADAT

Ngenang pasal rambai jaku pekit, Besaup Mekuhka Adat enggau Main Asal Dalam Arus Pemansang ku Elyana, iya rindu ninga leka tebah orang kelia ti munyi di baruh nya;

Dikelala Buah Ari Langgu,
Dikelala Daun Ari Kayu,
Dikelala Basa Ari Penyiru,
Dikelala Bansa Ari Jaku,
Dikelala Akal Ari Penau,
Dikelala Ulah Ari Jelah Siku Siku.

Ku iya, rambai jaku nya kebendar mai mayuh reti nitihka penemu siku-siku ti diperati ari mayuh sukut enggau empas.

“Nyadi ba aku, pengarap aku nuju kitai ke rebak biak rebak jungak, rebak dudi rebak asie, ngarapka kitai beserakup ngemeranka adat sereta main asal kitai Iban.

“Dalam arus pemansang tu mayuh palan rama ulih alai kitai mantaika main asal kitai iban, ambika chunto nengah Facebook, enggau Youtube.

“Dua iti palan tu meh palan rama ti benung tebilang alai kitai semua ngulihka sereta meri penemu senentang adat enggau main asal kitai Iban.

“Kemeranka meh adat enggau main asal bansa kitai empu, enti nadai penemu tau betanya ba sida ke tuai. Anang kitai semina ngangkatka pengarap sereta adat menua bukai.

“Enggi kitai patut disangah aba dilah, direngung ba tengkurung rekung ngambika enda padam enda terunjam, enda punas semampai badas tau ditimpai orang ari menua bukai.

“Kitai nadai ngadang utai baka tu ulih mega ulih nambahka pengerembai ngagai asil dagang temuai menua kitai Sarawak, enti salah enda ngawa.

“Bisi orang ke nemu, enti tinggi sida nemu mapar, enti baruh sida tau manggal, tang anang sesekali takut nguji ngerembaika adat bansa kitai.

“Aku ngarapka kitai semua semampai bepegai ba jaku tu; bejalai betungkatka adat, tinduk bepanggalka pengingat.

“Orang tuai mega ngempu tanggung pengawa ti besai ngajar kami ke rebak biak tu. Beserakup meh kitai ngemekuhka adat enggau main asal kitai Iban,” ku iya nibarka jaku peransang.

JULUK ATI NYADI PENGAJAR MATEMATIK

Pejuluk ati Elyana udah tu sigi ngemeranka pelajar ngagai tikas ti tinggi agi, enti ulih enggau orang ngambi gelar pengajar.

Ba iya empu, pementas, pemanah budi enggau pemesai jasa bala pengajar endang enda ulih dibalas enggau duit ringgi, reta pengereja.

“Lalu enti bisi tuah enggau jereki dudi hari ila, aku deka nyadi siku pengajar subjek Matematik.

“Aku chukup rindu belajarka subjek Matematik kenyau ari sekula primari lalu nyadi siti ari subjek dikerindu ba sekula nyentuk diatu,” ku iya madahka juluk ati diri.

Kelimpah ari nya, Elyana mega madahka diri deka ngujika nasip enggau orang bepekit baru.

“Enti bisi pekit digaga orang ba panggau dudi ari, aku sigi nguji enggau orang ngeruh ai baru.

“Ni kitai nemu nasip diberi petara ila, ditambah bisi peneleba bepekit sekali tu engka ulih menggi gelar dijuluk ati.

“Ngarapka petara semampai ngemataka pejalai kitai semua. Aku ngarapka semua kitai selalu mujur dalam pengidup lalu bulih juluk ati ari pengeras kitai empu,” ku sampi iya.

JASA DIKENANG

Ngena peluang nya, Elyana meri tabi basa pemadu tinggi nuju YB Datuk Ali Biju ti udah melanja penuh pejalai Pekit Kumang Online 2021.

“Terima kasih YB ke pemanah budi enggau peluang diberi ngagai bala pemekit ngansah enggau mantaika pengelandik diri ba adat enggau main asal Iban.

“Tabi puji ke pemujur bala komiti pengatur pekit betuaika Seman Endoi, Koordinator Pekit, Leslley Kalom enggau Juru Teknikal, Zecharia Jana Chendang sereta raban komiti pekit ke bukai.

“Terima kasih besai nuju semua kelebih agi rayat Sarawak ti udah nyukung bala kami ke bepekit nengah undi kita.

“Undi sereta sukung kita chukup meri reti ti besai ngagai kami pemekit. Undi kita meh ti ngubah pejalai kami ba pekit tu. Terima kasih laban udah andalka aku ngesan gelar Lulong 2021.

“Nuju kaban belayan, suku juru, sereta bakih aku mega, enti nadai kita nyadi tulang belakang aku, nadai ulih jauh singkang pejalai aku.

“Enggau nya terima kasih besai mega nuju semua kita. Tabi Kitai Nyaga Kitai,” ku Elyana nyimpul kenang diri.