Kreativiti pengajar SK Ng Oyan matak nembiak belajarka STEM

KAPIT: Enti dipeda sekali ngilas, tentu kitai ngumbai tu studio pemerindang endur bemain video tauka gamerz streamer.

Engka bisi sekeda kitai madahka bilik tu di mengeri besai baka Kuala Lumpur, Johor Bahru tauka di Kuching.

Kebendar, tu mih bilik Stem ba sebuah sekula di menua ulu Sarawak, Sekula Primari (SK) Nanga Oyan ditu.

“Tuju kami duai bakih aku semina deka meransang nembiak rindu belajarka subjek Sains, Teknologi, Injinir enggau Matematik (Stem).

“Nya alai aku ngarapka mayuh agi pengajar bukai di menua tu ulih ngena kreativiti enggau pemintar runding diri narit ati bala nembiak bisi pengerindu ba subjek tu,” ku pengajar Mohd Syauqi Abu Hassan.

Iya enggau pengajar Khairul Anwar Othman teulihka runding numbuhka bilik Stem pemuas ke diau di sekula sekumbang nembiak kemisi nyentuk taun baru.

Lebuh dirandau Suara Sarawak, Mohd Syauqi madahka diri deka mai bala nembiak di Kapit sedar enggau angkun agi belajarka subjek Sains enggau Matematik udah tu.

“Terubah suba, penemu tu semina buah kenang enggau bakih sama bilik tang enda nyangka tau nyadi nyata, lalu diatu udah tembu 95 peratus.

“Geledak bisi api tauka glow in the dark floor. Nyangka semina sekula tu aja di Bagi Menua Kapit bisi teknologi (bilik stem) baka tu naka diatu,” ku iya seraya tuchum.

Inisiatif Mohd Syauqi enggau bakih iya nya setipak enggau pengawa perintah ngansak rebak biak nyikap diri ngena penemu Stem napi dunya sains enggau teknologi kemaya hari.

Berita penuh ba Ruai 4 sehari tu.

INOVASYEN… Gaya bilik Stem di SK Nanga Oyan, Kapit.

 

KREATIF… Pengajar Mohd Syauqi mantaika asil bilik Stem di SK Nanga Oyan, Kapit.

Suara Sarawak