SARATOK: Nama Friday Belik dibantaika Ketuai Raban Progresif Demokratik Parti (PDP) ba mua mayuh deka dipilih ngarika parti nya ba pengawa bepilih besai kaunsil nengeri (PRN-12) ti deka datai.
Mandal Presiden PDP,Rolland Duat Jubin madah, pemutus tu digaga lebuh Aum Supreme Kounsil ti diatur kena 26 haribulan minggu tu tadi ita nya kena Hari Satu.
“Endang amat sebedau tu aku bisi nyempulang pejalai siku orang ti ngelaku diri minta pilih nyadi chalun PRN-12 ngarika PDP ba Krian ditu.
“Tang naka tu, udah aum tu tadi diperati enggau silik lalu semua ketuai dalam parti setujuka pemutus deka ngangkatka Friday nyadi chalun ba N.39 Krian ila.
“Nama iya endang udah disetuju lalu diatu semina bepanggai ba Kepala Menteri Datuk Patinggi Abang Johari Tun Openg ti nyadi ketuai semua parti komponen dalam Gempung Parti Sarawak (GPS) sekalika nerima tauka nulak nama iya (Friday).
“Lalu aku empu ti nyadi mandal presiden parti PDP mega ngembuan pengarap ti besai ngagai iya (Friday) bepelasarka pemasai iya ke udah gawa enggau perintah.
Rolland bejaku munyi nya ba mua mayuh rambau Program Begulai enggau Rayat ba Rumah Thomas Sigat Mangka, Babas Mali, Sungai Brangan,Sebetan lemai ensanus.
Nambahka nya ku iya, Krian endang begunaka siku pengari ti regas sereta masai begulai enggau rayat ba renggat baruh lalu semua utai tu bisi ba iya.
“Friday tau disema baka tangki ai ti di engkah ba palan ti tinggi lalu ulih ngeluarka ai dalam tangki enggau deras laban ngembuan peneras ti chukup dikena ngenataika ai ungkup guna mensia mayuh.
“Nya alai,nyema mujur jemah udah tentu genap pemansang deka muntang agi diatur laban iya endang ngembuan pengelebih ba sukut nya,”ku iya baru.
“Lalu baka tu mih gaya chalun kitai ti ngembuan mayuh macham peneleba sereta disadang ulih nyalurka pemansang ngagai rayat jemah.
“Laban iya udah nemu lalu masai mutar penanggul rayat sekumbang iya ti gawa nyadi Residen Bagi Betong.
“Nya alai,ngarapka pengundi ditu (Krian) bela meri sukung ngagai chalun tu ila lebuh datai maya nya ila,”tandu iya enggau nyemetak.
