KUCHING: Juluk ngangkatka latih pengelandik ungkup pengidup menyana anak Sarawak dudi hari ulih dijapai nengah inisiatif Program Project of Dream Realised (Pro-DR) Roadshow 2023.
Tuai Pegawai Eksekutif (CEO) Kuching Skills College (KSC), Novert Sullang Datuk Douglas Sullang madah ke diri endang ransing ati lebuh terubah kolej sida nerima kangau ngaul diri ba progam nya.
Ku iya, inisiatif Tabung Ekonomi Gagasan Anak Sarawak (TEGAS) bekerejasama enggau KSC bejalaika sekeda aktiviti nyerumba Pro-DR 2023 baka Pekit Nyumai.
“Kami endang seruran naka ulih ngangkatka latih pengelandik kelebih agi ngaul gastronomi tauka muntang agi ditemu, pelajar pasal kaul entara pemakai enggau budaya.
“Ari nya kami chukup temegah lebuh dibai raban TEGAS ngemujur ke program tu laban ulih ngerembaika penemu ngagai raban diselinting kelimpah ngelakuka pengawa KSC empu,” ku iya lebuh dirandau Suara Sarawak.
Novert madah, TEGAS ke nyadi siti ari ejensi dikuasa Perintah Sarawak keran nampung pengawa ngemansangka modal mensia ba menua pesisir ngena chara ti meran agi.
Kuing pengawa sida nya ku iya endang nipak ke juluk Sarawak empu ti deka nyadi menua maju enggau bepenatai pemisi tinggi manggai taun 2030.
“Kitai sedar ke niat enggau tuju TEGAS tu chukup manah enggau ba pelasar ti betul dikena nempa komuniti nyulut ari semua sukut enggau pengawa.
“Tu ulih dipeda ari opis, ejensi enggau gerempung ti dikaul ba program serak tu ti mungkur semua pekara nuju pemansang enggau nyapai pemujur,” ku iya madah baru.
Raban KSC mega sedar ke mayuh peranak ba menua pesisir napi penanggul bekaul enggau akses internet lalu ngarap ke sida deka ngena peluang nya ngulihka penerang pemadu baru.
Novert nampung kenang ke ujung agi, KSC deka ngaul diri ba semua endur ngatur Pro-DR 2023 selampur Sarawak ari Lundu nyentuk ke Lawas nitih ke hari bulan udah ditetap.
Pejalai sida sebuat bepun ari selatan, menua Lundu, dientudika menua Padawan, terus ke Serian lalu endur keempat iya nya di Saratok.
Udah nya sida ngelawa Meradong, Kapit, Tanjung Manis, Kampung Semop, Mukah, Bintulu, Miri lalu kepenudi ba Lawas, menua utara din.
“Kami ari KSC betubuh empat iku, Pegawai Eksekutif Makit Enggau Jual, Adrian Abit, Pengajar Kanan KSC, enggau Sebastian Ali, enggau Pengajar KSC Tedrick Jana Katum sereta Presiden Kaunsil Pengari Nembiak KSC, Remington Merupi.
“Kami bisi dikangau TEGAS baum ba opis sida dua minggu sebedau pengawa Pro-DR 2023 belabuh laban sida ka gawa begulai enggau KSC.
“Aku beratika tuju Pro-DR tu chukup manah, pelasar meri penerang ngagai bala nembiak lebih agi ba menua pesisir pasal peluang pelajar ti bisi ba menua kitai ngambi sida ulih nanya sereta nemu enggau silik agi pasal kus ti dikerindu.
“Nengah program tu mega, kitai deka ka bala nembiak ke ba menua pesisir enda tinggal ba pelajar laban tu kunchi kena setipak enggau juluk KSC ti deka nempa nembiak landik enggau bepenau gawa ba pengawa ngaul gastronomi lalu ulih nyamin pengidup sida,” terang iya.
Ku Novert, penerang pasal kus bukai ke bisi disediaka KSC kelimpah ari kus gastronomi baka kus teknologi dron mega matak perati bala ke datai.
“Ba aku, Pro-DR 2023 tu inisiatif ti chukup manah dipejalaika TEGAS kena meri peluang sereta penemu ngagai bala nembiak ba menua pesisir pasal kus ti ulih diambi sida ke lepas SPM.
“Bala nembiak ke benung ngiga endur nampung pelajar tauka ngambi kus mega nadai salah ngiga penerang sekumbang ProDR tu diatur,” ku iya.
Nya alai Novert ngarap ke bala apai indai enggau nembiak ngerebut peluang ke bisi disediaka perintah nengah TEGAS laban pejalai sida nyau deka serap menua dilawa.
Entara pekit ke bisi diatur raban KSC dikena ngerichahka Pro-DR 2023 baka pekit nyumai kuie enggau pemakai asal nyengkaum ngajar chara mela pemakai ke betul enggau beresi.
Nambah ke nya, pengawa ukai semina ngaul bala nembiak aja, bala komuniti nyengkaum apai indai pen bela dibai masuk pekit ngambi meri peransang ngagai anak sida.
Ngena peluang nya, Novert meri besai terima kasih ngagai raban komiti pengatur Pro-DR 2023 ari TEGAS, bala pengari rayat, tuai komuniti enggau tuai raban bansa, bala nembiak, apai indai sereta bala bukai ke sama datai nyukung pejalai program nya.
