KSK ngemuntang Pemilu Indonesia 2019

KUCHING: Kotak Suara Keliling (KSK) ngemuntangka pengawa Bepilih Besai (Pemilu) Indonesia 2019.

Siku pengereja pengawa Bepilih Besai Indonesia, Ahmad Saudi madah tu sebagi ari chara baru dipejalai Republik Indonesia ngemuntangka bala pengundi di genturung kilang enggau ladang.

“Nengah KSK tu, sida SPR Indonesia empu datai ngelawa kilang enggau ladang di menua pesisir Sarawak ngemai peti undi ngemuntangka sida ti gawa dia ngundi lalu siti KSK enda lebih ari 300 undi.

“Sida ke diau jauh ari konsulat ulih ngundi nengah chara tu lalu enda ibuh ngelawa konsulat muai undi,” ku iya madah lebuh dirandau raban media ba Konsulat Jeneral Republik Indonesia, kemari.

Lebuh dirandau pasal bida Palan Ngumpul Suara Menua Luar (TPSLN) ke disedia ngagai sida ke deka bepilih, Ahmad Saudi madah TPSLN tu disedia ungkup semua nadai ngira jauh tauka semak.

NERANG SILIK… Ahmad Saudi meri penerang pasal KSK.-gambar Ghazali Bujang.

“Ba TPSLN, sida ke udah rejista datai kia deka muai undi, ukai kami mansang ngelawa sida.

“Sida ke apin ngundi mega diperansang ngelawa palan tu ngambika undi sida dikira,” ku iya.

Taja pia ku iya, agi bisi penanggul muai undi nengah chara KSK.

“Ambika banding, siku aku megai atur pengawa bepilih KSK di Sri Aman, Saratok, Betong lalu mayuh ladang bedau direjista dalam KSK.

“Ba genturung dipegai aku aja bisi 18 bengkah palan KSK lalu ke udah rejista diri semina lapan palan aja, sepuluh enda rejista lalu tu ngemai penanggul.

Kelimpah ari nya, ku Ahmad Saudi madah penanggul ba KSK tu iya nya ba kar menua.

Sebuah ladang mayuh pengereja lalu dibagi ngagai mayuh bengkah KSK, mar deka beratika sida ke udah ngundi tauka bedau.

“Sebedau KSK dipejalai, kami semina ngengkah peti, lalu ditinggal ba palan ngundi lalu sida ke ngundi deka nepu undi ke dalam peti nya.

“Tang mayuh penanggul nengah chara nya suba laban kitai enda nemu berapa penyampau tubuh ke ngundi nepu undi sida dia, lalu bisi ‘pengundi sebayan’ nyelit dalam undi nya,” ku iya madah.

Pengudah undi ditiap, mayuh penanggul nyadi ngujungka KSK dipejalai nentuka pengawa bepilih lurus agi.

Ketuai Panitia Pemilih Menua Luar, Adi Dewanto madah undi nengah KSK udah dipejalai ba enam bagi menua di Sarawak, iya nya di Miri mungkur Limbang enggau Lawas, Bintulu, Sri Aman, Sibu, Mukah enggau Kuching.