BAU: Kaunsil Pelilih Bau deka bebendar ngenegapka pengulih sistem servis kaunsil nya ngambika senutuk enggau penyampau rayat ke majak betambah.
Kenu ku Chairman iya, Anielia Siam, staf Kaunsil Pelilih Bau deka terus bebendar gawa enggau manah lebih agi ari sukut pemansang, pemeresi enggau pengelantang pengidup.
“Kualiti pengidup rayat deka terus dikemerat kelimpah ngetanka pemanah rampa menua nengah nambahka mayuh agi perengkaguna infrastruktur orang periman,” ku iya.
Iya madah munyi nya maya Pengerami Makai Taun ke-65 Kaunsil Pelilih Bau, ditu, ensana.
Berebak enggau nya, Anielia madah Opis Kaunsil Pelilih Bau deka bebendar numbuhka ‘Be Bold, Ambitious and Unified’ enda lama agi.
Ku iya dikena nyapai juluk nya, palan enggau produk dagang temuai Pelilih Bau deka diberi perati ungkup digaga.
Nangkan ke nya, Anielia madah raban sida deka terus bekerejasama engagu semua staf bejalaika tanggungpengawa diri.
“Tuju pekara tu ngambika servis kaunsil tu dikemerat nitihka polisi enggau atur undang-undang kaunsil.
“Nya alai, aku andal nengah pemisi kerejasama semua staf pengatur pengawa dia juluk perintah deka digaga manah ungkup rayat senutuk enggau juluk ngamatka ‘Greater Bau For All’,” ku iya.
Udah nya, Anielia madah kerejasama entara Kaunsil Pelilih Bau sereta opis enggau ejensi bukai beguna amayt dikena ngemujurka tanggungpengawa kaunsil nya.
“Nengah kerejasama tu, dikearapka ulih ngangkatka sistem servis perintah ungkup rayat sereyta meri asil manah ungkup semua orang ke bekaul,” ku iya.
Sebedau tu, Kaunsil Pelilih Bau udah nyapai tikas ngatur wang enggau pemujur bulih tikas 4 Bintang baka ke udah dipadahka Tuai Audit Menua kena 7 Januari 2017.
“Nya alai, aku ngarapka nengah sampi dia Kaunsil Pelilih Bau deka terus mansang nyapai rikod belanja betikas 5 Bintang udah tu ila,” ku iya.
