Kuasa ordinan KMKK ulih nagang MPKK ditumbuh

KUCHING: Menteri Muda Kunsil Kandang Menua enggau Pengawa Berumah Datuk Dr. Penguang Manggil netapka Ordinan Ketua Kaum dan Ketua Masyarakat 2004 ulih dikena nagang penumbuh Majlis Pengurusan Komuniti Kampung (MPKK) di Sarawak.

Bejaku ngagai pemberita tembu Program Licha Rampa Menua Pelilih Kuching di Balai Besai Yayasan Sarawak ditu tadi, iya madah Perintah Sarawak bisi kuasa neritka undang-undang nya.

“Kitai deka neritka undang-undang tu ba maya ke ngena alai tu siti chara ke ulih dikena.

“Taja pia, ukai siti tu aja ke ulih dikena kitai nagang penumbuh MPKK. Kitai mega ulih nguna sistem undang-undang bukai,” terang iya.

Ngenang sentang pengeran Perintah Besai Pakatan Harapan (PH) numbuhka MPKK, Penguang madah kaunsil enggau komiti nya deka mambarka penyerakup rayat di Sarawak.

Iya ke mega Kaban Kunsil Negeri (Adun) Marudi pechaya peranak ke diau ba menua pesisir deka balat agi pambar.