Kuching deka diangkat nyadi Tuai Pengerami Hari M’sia 2019

KUCHING: Hari Malaysia kena 16 September deka diintu di Mengeri Besai Kuching taun tu.

Kenu ku Sapit Menteri Dagang Dalam Menua enggau Pekara Bebelika Barang, Chong Chieng Jien, perambu ngintu Hari Malaysia di Kuching udah dipesetuju rambau aum Pakatan Harapan (PH) Sarawak kemari.

“Kami deka merambu program tu ngagai kabinet ngambika Hari Malaysia kena 16 September deka diintu di mengeri tu.

“Perambu tu setipak enggau semengat sereta juluk Perintah Besai ti ngemeratka semengat Sempekat Malaysia 1963 (MA63),” ku iya rambau aum pemerita di opis DAP di Padungan.

Iya mansutka penerang nya pengudah tembu baum begulai enggau bala kaban Parti PH Sarawak ditu kemari.

Pia mega ku Chieng Jien, program nya nyadi pengerami keterubah diintu Perintah PH di Sarawak pengudah diatur di Sabah dalam taun nyin tadi.

Sama datai baum Menteri Kereja Raya Baru Bian, Kaban Parlimen Bandar Kuching-Dap Dr Kelvin Yii Lee Wuen, Direktor Operasyen (war Room) Nengeri Sarawak Zakaria Bujang sereta bala pengari ari PH ke bukai.

SEMENGAT MA63… PH Sarawak ngeringka semengat MA63, Baru Bian (tengah), Chong Chieng Jien (kanan) disempulang bala kaban parti PH bukai pengudah tembu baum ditu kemari.

Suara Sarawak