ARTIKEL

Kuching endur ngatur aum IRSE

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Kuching deka nyadi palan Aum Institusyen Injinir Atur Kereta Api (IRSE) Malaysia 2023 ti deka diatur kena 5 enggau 6 April tu.

Aum diatur Seksyen IRSE Malaysia lalu dipatau Sarawak Metro Sdn Bhd nya keterubah diatur ba Kuching enggau ba luar Indu Mengeri.

Sarawak Metro Sdn Bhd ba sebengkah penerang madah, aum dua hari nya deka diatur ba Hotel Riverside Majestic lalu deka dipenyadi Menteri Pengangkut Sarawak, Datuk Seri Lee Kim Shin ba hari keterubah.

Ku penerang nya, bala deligit bepeluang mendingka bemacham jurai nyengkaum senentang pekara injinir atur kereta api, isu rel enggau perengka pengangkut mensia mayuh ari 10 pengelicha ti dikangau datai ba aum nya.

Penerang sebaka madah, bala pengelicha nya nyengkaum Presiden IRSE, Andy Knight ari United Kingdom ti deka meri licha senentang Nempa Tunga Kuing enggau Chairman IRSE Singapore, Robert Cooke meri licha Metro Signaling Safety – From Generic Product to a Safety Operating System.

Pia mega, Sekretari Mendam Opis Menteri Pengangkut Sarawak, Datuk Ir Alice Jawan Empaling bekaul Transformasyen Perengka Pengangkut Mensia Mayuh Sarawak sereta pengari IRSE Indonesia, Mulyadi Sinung disadang deka bejuraika Pelin Besai Perengka Pengangkut ba Indu Mengeri Nusantara.

Pekara dipejurai nya bekaul pemansang pemadu baru ba industri rel enggau perengka pengangkut mensia mayuh ngagai pelin besai perengka pengangkut mengeri sereta pangku pengawa sistem kereta api ba pengawa nadai ngemansutka gas dudi hari.

IRSE Malaysia enggau Sarawak Metro ngarap aum nya nyadi pelasar dikena meransang pengawa bekunsi penemu kelebih agi ba pengawa meri penyedar senentang pengelikun enggau standard atur ti besai agi ba sektor rel enggau perengka pengangkut mensia mayuh.

Sida mega ngarap aum nya nyadi pelasar dikena narak pengerindu enggau penyedar nembiak rebak baru bekaul pengawa puang ba industri kereta api kelebih agi ba sektor injinir atur enggau perengka pengangkut mensia mayuh.

Aum ti disukung BESarawak nya disadang deka digulu bala deligit ari United Kingdom, China, Hong Kong, Indonesia, india, Peranchis, Singapore, Switzerland enggau Malaysia.

BERITA LAIN

BERITA TERBARU