Pemantu Menijar Kuching FA, Iswandy Ali Hassan madah, nadai pengeri ditapi bala pemain iya lebuh deka besatup enggau Johor Darul Ta’azim (JDT) ba renggat keterubah Pekit Mangkuk Malaysia 2020 ba padang wai seberai kena 6 November tu.
Tang, kami ngasaika undi betemu enggau tim kuat tu peluang pemain bulih peneleba ke baru.
Kelimpah ari nya, peluang tu mega dikena ngemanah agi chara sida bemain.
“Ulih masuk Pekit Mangkuk Malaysia 2020 endang siti bonus ngagai kami serak tu.
“Nya alai, kami enda bangat irau betemu enggau sapa orang ke deka disatup,” ku Iswandy maya dipinta meri penemu pasal undi dalam Pekit Mangkuk Malaysia 2020 kemari.
Kenu ku iya, taja takah pengering chukup jauh entara Kuching FA enggau JDT dalam nyadi champion.
Tang ku Iswandy, sida deka nguji bemain enggau naka ulih lalu enda muai peluang ke dikembuan.
“Kami deka bemain enggau manah maya nya ila,” ku tandu Iswandy.
The City Boys diatu benung ba ‘injin ke udah angat’ pengudah nembuka main ba Liga Premier 2020 enggau pemutus menang (2-0) ngalahka tim Kuala Lumpur di Stadium Hang Jebat, Melaka kena Hari Enam tu tadi.
