Kuching lima taun deka datai nyadi mengeri moden

KUCHING: Perintah Sarawak deka ngemansangka sebagi ari pelilih ba baruh kuasa Kaunsil Bandaraya Kuching Selatan (MBKS) enggau Kaunsil Bandaraya Kuching Utara (DBKU) nyadi mengeri pintar ti moden ti enda ngeruga kampung asal.

Kepala Menteri Datuk Patinggi Abang Johari Tun Openg madahka, naka kediatu Perintah Sarawak udah ngemendarka pelin asal pemansang nya ti deka dipejalai dalam kandang lima taun agi.

“Ba baruh MBKS, kitai deka ngemansangka pelilih Padungan lalu ba baruh kuasa DBKU pemansang nya deka bepun ari Hikmah Exchange nyentuk ngagai Jalai P.Ramlee.

“Tu endang pengawa kitai ngambika ulih ngemanahka enggau ngemodenka mengeri Kuching awakka ulih narit ati mensia mayuh,” ku iya.

Iya bejaku munyi nya ba Pengerami Ngintu Taun Hari Mengeri Kuching Ke-32 di padang MBKS ditu, kemari.

BEJADI…Kepala Menteri Datuk Patinggi Abang Johari Tun Openg dikemataka Datuk Bandar Kaunsil Bandaraya Kuching Selatan Datuk Wee Hing Seng (tiga kiba) enggau Datuk Bandar Kaunsil Bandaraya Kuching Utara Datuk Junaidi Reduan (empat kiba) rambau kelai bejadika Pengerami Hari Bandar Kuching Ke-32. Bela bisi dipeda Sapit Sekretari Nengeri Datuk Seri Mohamad Abu Bakar Marzuki, Tuai Pengatur Pengerami Cr. Abdul Baderi Sahmat, Sapit Kepala Menteri Datuk Amar Douglas Uggah Embas enggau Menteri Kaunsil Kandang Menua enggau Pengawa Berumbah Datuk Seri Dr. Sim Kui Hian. Gambar Ramidi Subari.

Ku Abang Johari, pelilih nya ila deka disambung enggau jalai Transit Aliran Autonomi (ART) sereta perengkaguna ti lebih moden.

“Dalam pengawa ngemansangka pelilih nya ngambika lebih moden, kitai ngelaluka kerejasama ari serikat peribit.

“Kelimpah ari nya, inisiatif digital ti dibantaika Perintah Sarawak diatu udah nyadi malin ngagai nengeri bukai di Malaysia,” ku iya.

Tandu iya, Mengeri Kuching endang ngempu penyelai laban ngembuan sejarah lama lebuh berubah ngagai mengeri pintar jemah ila.

Sama bisi datai kemari Sapit Kepala Menteri Datuk Amar Douglas Uggah Embas, Menteri Kaunsil Kandang Menua enggau Pengawa Berumah Datuk Sri Prof Sim Kui Hian, Menteri Muda ba Opis Kepala Menteri (Pekara Islam enggau DBKU ) Datuk Dr Abdul Rahman Junaidi, Datuk Bandar Kuching Selatan Datuk Wee Hong Seng, Datuk Bandar Kuching Utara Datuk Junaidi Reduan enggau bala bukai.

Ba pengerami kemari mega, Abang Johari lalu bejadika ‘New Norm Park’ ti digaga muakka kiba begunan MBKS dikena ngenang jasa sida ti gawa ba luan lebuh ngelaban pengerekai igi penyakit Covid-19 di menua tu.

Suara Sarawak