Kuching mengeri keterubah di Asia Tenggara bisi bas hidrogen

KUCHING: Agi mayuh orang enda nemu Kuching nya mengeri keterubah ba Asia Tenggara ngembuan bas hidrogen pechuma ungkup mensia mayuh.

Inisiatif servis bas hidrogen pechuma dipejalaika Perintah Sarawak tu nyendiaka dua pejalai iya nya neresa Arung Pesaka Ba Mengeri Besai ti dibuka ninting hari seraya rembus ke Damai semina dibuka Hari Enam enggau Hari Minggu aja.

Beserimbai enggau Hari Tanah Sedunya 2021, Spativate udah bekerejasama enggau Sarawak Metro Berhad (Sarawak Metro) sereta Kaunsil Pemansang Ekonomi Sarawak (SEDC) ngatur program khas ke semina ngangauka tujuh iku temuai ari bemacham industri nyereta “Council : Hydrogen Bus Tour” kena 10 April tu tadi.

“Ngelama tu, enti program Hari Tanah Sedunya, kitai deka nanam pun kayu, beripai enggau kimpin meri penyedar ba sekula tang kami deka bejalaika program ti bebida, ukai semina bekunsika teori pasal penegap rampa menua.

“Kami dekaka sida ngasaika peneleba nepan bas hidrogen sereta belajarka Agenda Hidrogen Perintah Sarawak,” ku Pemungkal Spativate, Seph Haini.

Program tu udah mai semua temuai khas nya nemuai ngagai mengeri Kuching berengkah ari penyangkai keterubah di Hotel Riverside Majestic Kuching nyentuk Damai Central.

Pejalai bas hidrogen pengelama sejam tu mega meri peluang ngagai bala temuai bekelala enggau pangan diri sereta bekunsika penemu pasal industri sida.

“Kami ngatur pengawa tu berapa minggu ke udah laban Hari Tanah Sedunya nya diatur kena 22 April tu tadi iya nya maya bulan Ramadan.

“Kami bejalaika inisiatif kreatif enggau innovatif, ari duduk berandau dalam bilik aum baka ngelama tu, manah agi kitai berandau dalam bas hidrogen lalu ulih meda mengeri Kuching? Kemaya kepenudi iya nuan nepan bas ba Kuching?,” terang Seph nbaru.

Operasyen servis bas hidrogen nya udah disambung baru pun bulan March tu tadi pengudah diketu pengelama dua minggu laban bisi sekeda deriba bas nya kontak semak ngagai orang ti ditemu positif Covid-19.

“Pekara tu endang enda ulih diseliah lalu nya kebuah Sarawak Metro udah bejalaika inisiatif ngetuka dulu servis kami ke alai semua bas nya udah disanitasyen.

“Diatu, operasyen nya udah dipejalai baka selama kenyau ari pun bulan March tu tadi,” ku Menijar Media Sarawak Metro Letitia Samuel.

“Ungkup Program Council: Hydrogen Bus Tour tu, kami sepenemu ngurangka penyampau penumpang ngagai setengah aja ngambi bala penumpang nyaga takah enggau pangan diri.

“Kerejasama strategik nengah program tu ulih mantaika servis bas hidrogen kami, udah nya organisasyen luar deka sedarka pengulih bas hidrogen tu nyadi perengka pengangkut ungkup program korporat sida dudi hari,” terang iya.

Ba taun 2021 tu, Spativate deka bekerejasama enggau opis perintah enggau peribit bukai ngambi nyadi projek rama korporat ke manah agi ungkup bala nembiak.

Suara Sarawak