Kuching Skills College komited matih pengereja landik

KUCHING: Kuching Skill College nunda pemujur menua maju baka Jerman nyelinting pengelandik teknikal dikena nyikap bala graduet enggau sida ti diketuka gawa ngena penau beguna.

Ketuai Pemesai Eksekutif iya, Novert Sullang madahka palan latih pengelandik sida ngatur kus teknikal enggau vokasional ngaul teknologi baru baka dron.

Ku iya, Reskilling Program for Retrenched Workers tauka Program Ngansah Baru Pengelandik ungkup Pengereja Diketuka Gawa nya inisiatif muka mayuh agi pengawa puang ungkup raban diselinting lebih agi ketegal pandemik Covid-19 diatu.

“Nengah inisiatif tu, bala pengereja ti udah diketu gawa deka disikap ngena pengelandik industri tambah baka dipinta pengaji tauka sida bisi penau ngepunka baru pengawa.

“Kelimpah ari gawa makai gaji, sida tu mega ulih ngaul diri ba dagang diri empu lalu tu ulih nyadika tiang sukung ngagai sida pengudah putus kereja.

MAYUH PENGULIH… Teknologi dron ulih dikena ba mayuh bengkah pengawa ti mai pemaik.

“Program khas nadai bebayar tu nerima sida ti diketu gawa enggau bala graduet ti apin bulih kereja jam ke diatu.

“Kitai bela nemu industri dron nyendiaka mayuh pengawa puang dalam industri baka betanam betupi, pengawa ngintu, minyak enggau gis, pengawa berumah, pemerindang, logistik, pesaka tanah, bejual enggau makit, enggau ke bukai.

“Tu deka meri pengelebih enggau nilai tambah ngagai bala pengereja ngerebut pengawa puang dalam industri ke bisi diatu tauka jemah ila.

“Nya alai kami ti udah dilempaika tanggung pengawa ngatur kus enggau latih berasai temegah ati nerima kita ti bisi ati ngansah penau enggau pengelandik begulai enggau kami,” ku Novert.

Ari nya, Kuching Skills College meri selamat datai ngagai ekonomi dron ngagai semua ke bisi ati ngulu program khas tu ke alai kita deka bulih setipikit profesional enggau diberi elaun latih.

ARAM ENGGAU KAMI… Staf Kuching Skills College semampai sedia mantu sida ti begunaka bantu ba latih pengelandik.