Kuching status oren, kes positif udah manggai 25 kes

KUCHING: Pelilih Menua Kuching sehari tu betukar ari status kuning bebali ngagai status oren pengudah penyampau semua kes positif ke majak nambah manggai 25 kes.
Komiti Penyangga Penusah Ngenyit Nengeri (JPBN) dalam penerang media kemari madahka Pelilih Menua Samarahan mega betukar ari status gadung ngagai status kuning pengudah ngerikodka siti kes baru kena rampit Covid-19.
Nangkan nya, Pelilih Menua Miri, Sibu, Bintulu, Meradong, Bukit Mabong, Lawas enggau Sri Aman agi mengkang ba status kuning ke alai 31 buah pelilih menua bukai di Sarawak agi ba status gadung.
Bisi 16 kes positif baru Covid-19 dirikodka ba Sarawak sehari tu mungkur 10 kes di Kuching, Miri (4) enggau siti kes di Samarahan enggau Julau.
Tu ngujungka penyampau semua kes positif Covid-19 di menua tu nambah ngagai 1,196 kes.
Lima kes berampit di Kuching ngaul orang ti bekaul enggau kes positif sebedau tu nyengkaum siku nembiak mit ke baru beumur setaun.
Kelimpah ari nya, empat kes di Kuching ditemu lebuh kes pulai ari menua ke ulih dirampit Covid-19 iya nya Semenanjung Malaysia ke alai siku agi ditemu positif lebuh beperesa sebedau bekejang ke Sabah.
Ba Miri, tiga kes positif ditemu berampit ari kes positif sebedau tu ke alai siku agi kes positif ditemu lebuh beperesa pengerai ketegal deka bekejang ke Labuan.
Ungkup kes positif di Samarahan ngaul siku indu ti beperesa laban deka bekejang ke Singapura ke alai siti kes di Julau ngaul siku lelaki ti baru pulai ari Johor.
Berebak enggau nya, bisi lima kes udah suman sereta dikemendarka pansut ari sepital. kes tu mungkur tiga kes di Sepital Besai Sarawak enggau dua kes di Sepital Miri.
Tu ngujungka penyampau kes suman sereta dikemendarka pansut ari sepital nambah 1,090 iku.
Diatu penyampau orang ti agi diperubat ba sepital bisi 87 iku iya nya HUS ngerikod 44 iku, Sepital Sibu (19), Sepital Miri (18), Sepital Bintulu (5) enggau Sepital Sungai Buloh (1).
Pia mega, sehari tu bisi 58 Pesakit Agi Dipatau (PUI) baru dirikodka ke alai 13 PUI agi nganti pemutus ari makmal.