Kulit Langgir sabun asal Dayak

SIBU: Penatai musin buah endang seruran dianti kelebih agi enti buah kampung ti jarang dipeda, semina bebuah setaun sekali tauka nadai semaya bebuah.

Macham bansa buah kampung bisi tumbuh dalam kampung tuai nyengkaum ba tanah temuda enggau temawai.

Entara bansa buah kampung mayuh ditemu tumbuh di menua tu baka kemantik, sibau raras, isu, pakan, sikup, buah ma enggau langgir sereta ke bukai.

Kelimpah ari diempa pia aja, buah kampung mega mayuh macham guna ba daya idup kitai bansa asal kelebih agi buah langgir lalu sekeda menua ngumbai buah tampoi enggau buah puak.

Sekali tu Suara Sarawak mai kitai beratika gaya pendiau enggau guna buah kampung tu.

GALAK… Pun langgir tebal agi tumbuh ba menua bebukit, tanah emperan.

Buah langgir tauka nama sainstifik Xanthophyllum ke alai pating alus, buah segala urung enam inchi (diameter) pemesai, bechura gadung tauka kuning gadung enti udah chukup mansau.

Daun bechura melau tauka seram seraya bungai iya ngerembai lalu pun langgir ulih tumbuh galak ba tanah bebukit enggau emperan tauka kerangas.

Nitih ku jerita tuai, enti buah langgir pansut nandaka musin buah raya nyauka abis tauka udah datai ba ujung musin.

Isi burak sereta manis asai gula batu lalu sida ke tuai suah mekat bala ke nembiak, buah ti dikupak enda tau enda disepu dulu sebedau diempa enggaika dilah betu enggau batang rekung gatal.

Kelimpah ari isi iya tau diempa, kulit buah tu mega mayuh guna ba daya idup kitai Iban kenyau ari menya.

MAYUH GUNA… Kulit buah langgir ke udah rangkai tau nyadi sabun, ditunu muru antu enggau macham guna bukai ba daya idup Iban.

Kulit buah ti dikupak manah dijembi sekalika diempara pia aja atas jagan tauka capan sereta bisi sekeda ditusuk lalu digitang ba tiang para dataika rangkai.

Kulit udah chukup rangkai tau ditutuk dataika alus kena masu buk enggau ngusuk pala muai selupu baka kitai diatu ke ngena sabun buk. Repu kulit langgir deka bepupu enti dichampur ngau ai.

Nya kebuah orang tuai kelia jarang amat bisi selupu pala laban sabun sida nadai mayuh utai dichampur baka diatu.

Nambahka nya, kulit buah tu mega dikena orang bejalaika adat ngambi entabalu, sida ti udah parai laki tauka bini.

Kala mega ninga sida ke tuai madah, kulit langgir manah ditunu enti hari kudi laban asap deka ngemediska leka mata Antu Tinggi ngujungka antu nya deka ngelaung nengah jalai bukai ari nujah menua tauka endur nya.

Pia mega maya orang nirika gawai ke alai kulit langgir tu sebagi ari rengka dikena ngereja pengawa nyugu babi kena bechenaga lalu sida ti bisi penemu mulut mega deka mandi meresi tubuh diri ti udah kamah ngena tiga macham chura tanah lalu nyebut leka sampi, “Aku belanggir ngapuska dosa”.

Lebuh indu dara ngambi kulit langgir ke sabun, sida lalu besampi, “Ooo jeritan wai, tampak nama tampak rita”, ke alai leka sampi tu manah amat ngayuka diri belaki orang belambar lalu enti uoang nya bisi penemu mulut tauka dikumbai puchau tau nyadika jayau kena mandi.

Nya alai kitai diatu jarang amat tetemuka rita, bulih kenyap Orang Panggau baka sida aki ini menya laban sida seruran semak antu tin emu meri pengaruh, ubat pengeraja, ubat ngasuh kitai bulih padi enggau utai bukai laban bau renggut kerupak pau iya nya kulit buah langgir.

Pia mega randau pakar baka buah bangkit endnang mansik mantik idung bansa orang ajih, bunsu jelu, bunsu antu ti ngasuh kitai kelia mudah ngambi mimpi diberi upengaruh ke beguna.

Suara Sarawak