SERIAN: Unit Saberkas enggau kerejasama kaban Komiti Pemansang enggau Pengelikun Genturung Pendiau (JKKK) Kampung Sungai Barie, Serian deka ngatur Pekit Kumang Gawai Siburan dikena ngerichah Pengerami Gawai Dayak 2023.
Chairman Pengatur Pekit, Phillip Jabu nyemetak madah, Pekit Kumang Gawai nya deka diatur kena 24 June tu di Balai Kampung Sungai Barie, Serian.
Ku Phillip, pekit nya udah dibuka lalu sebarang penerang silik tau telefon ngagai iya ba lumur, 013-5774549. “Kitai ngelalau indu Iban tauka penakan Dayak kelebih agi ba Sarawak diperansang masuk pekit tu.
“Renggat tumu deka diatur kena 18 June tu,” ku Philip.
Philip nyemetak madah, sida ti kala menang pekit kumang renggat pelilih sereta bagi menua enda dikemendar masuk pekit tu.
“Sida ti masuk pekit kumang nya ila meseti ngena ngepan Iban,” ku Philip seraya madahka bayar masuk pekit tu RM50.
Ku Philip, perais besai nganti bala pemenang.
Iya mega madah, gelar Kumang deka nerima mata duit RM2,000 seraya Lulong deka nerima perais RM1,500 lalu Selinggar Matahari deka nerima RM1,000.
“Sida ti bulih lumur empat enggau lima bela mai pulai perais mata duit RM500.
“Tiga pemekit ti mujur masuk renggat kepenudi deka nerima mata duit RM300,” terang iya baru.
Phillip madah baru, perais mata duit RM300 enggau RM200 deka diterima pemekit ti mujur menang kategori ngepan pemadu manah enggau kategori bebakat.
