Kuntau patut diangkat nyadi aktiviti kokurikulum sekula

KUCHING: Seni kuntau nyadi sebagi ari seni ngetanka diri ditampung raban bansa Iban.

Taja pia, mayuh nembiak rebak diatu enda nemu gaya seni kuntau ke amat.

Suara Sarawak ngena peluang ninjau penemu chara ulih dikena ngetanka seni kuntau tu nentuka iya enda mudah punas ngapa diseruyut pemansang dunya.

Ganit Gunarso, 23 taun, nembiak bansa Kelabit madahka diri nadai seling penemu pasal kuntau taja teleba begulai enggau nembiak bansa Iban.

“Ba penemu aku empu, seni tu manah enti ulih dibantai ngagai nembiak rebak baru laban tu siti ari pesaka asal bansa Iban baka ajat mega.

Ganit Gunarso

“Engka siti ari kebuah ngasuh seni tu enda ditemu nembiak rebak baru laban nadai dibantai baka seni tauka main asal bukai,” ku iya.

Nya alai ku iya, manah amat enti seni tu ulih dibantai baka silat tauka ajat ba pengerami besai baka pengerami melah pinang ngambika bisi dipeda bala mayuh.

Ari chara tu mega ku iya, kitai deka ulih narit ati raban nembiak lalu nerenak ulah angkunka seni kuntau tu ba sida.

“Kelimpah ari nya, enti seni kuntau tu ulih dipasuk nyadi sebagi ari aktiviti kokurikulum sekula, tu pekara chukup manah.

“Tang penemu baka tu patut diperambu enggau bulih pemendar ari Opis Menteri Pelajar Malaysia (KPM) dulu sebedau iya dipejalai ba sekula,” ku iya nerang.

Adrian Philip

Ku Ganit, enti sema seni kuntau tu enda ulih diajar ba sekula, nadai nanggul mega bala nembiak ti bisi ati belajar ba luar.

“Enti amat bisi pengeran enggau pengangkun, kitai patut naka ulih ngiri enggau belajarka penemu pasal pekara nya.

“Kebuah pia laban tu meri penguntung ukai semina ngagai diri empu aja tang mega ngagai rebak baru ti deka nampung seni kuntau jemah.

Seni kuntau tu enda nyalah baka silat semina enda mayuh orang ditemu bisi ngajar seni tu ba menua kitai.

Ku penemu Adrian Philip, 33 taun, orang bekuntau tu ukai semina belajarka bungai enggau buah kuntau aja tang bisi penemu bukai deka ngasuh ati sida berani sereta kering lebuh betempuh enggau munsuh.

Anderson Wan

“Baka ditemu aku, enti orang ti deka tamat belajar kuntau, suah agi iya miring, bebunuhka manuk ba kelang sereta nganjung piring.

“Diatu, kitai udah bisi pengarap baru nyadi miring tu nyau enda dikemeran ngujungka sebagi ari adat ba seni kuntau majak lenyau,” ku iya nerang.

Ku Adrian, ngajar kuntau ba sekula bisi pemar taja ulih diatur tang laban seni nya engka enda ulih nitih 100 peratus chara kuntau asal.

“Enti semina belajarka bungai enggau buah kuntau aja, nya nadai penanggul asal bisi pengajar endang bisi seling penemu enggau nemu bekuntau.

“Enti kitai dekaka kuntau tu ditemu nembiak rebak baru, bala komuniti enggau gempung ukai dikuasa perintah (NGO) patut besaup ngatur pekit enggau numbuhka kelang kuntau,” ku iya.

Iya mega pechaya juluk tu ulih dijapai enti bisi raban ngepun ari renggat baruh, ditangkan renggat sekula dataika renggat tinggi agi enti bisi pengajar nemu ngajar kuntau, ku iya nambah.

“Nadai salah kuntau diajar ba sekula enti sema bisi kebuah ti patut seni tu diangkat nyadi sebagi ari aktiviti kokurikulum.

” Ari nya, bala nembiak rebak baru deka ngelala main asal ti dikumbai kuntau,” ku iya nandu.

Anderson Wan, 25 taun, madahka antara kebuah seni kuntau tu enda dikelala nembiak rebak baru ketegal kelalu ekslusif tauka jarang dibantai.

Rebak baru nyau enda ngelala seni ngetanka diri dikembuan raban bansa Iban laban kelalu dipelalai, semina sekeda raban aja nampung seni tu.

Tambah mega kelalu mayuh penti pemali, ngasika ajar enggau tangkan guro nyengkaum adat ti patut dititih baka bansa piring dikena.

Ambika chunto, piring mega enda tau sengapa lebuh minta tauka niat belajar kuntau, nitihka turun piring tiga, piring lima, piring tujuh enggau piring lapan sereta piring semilan, nitihka peningi penemu kuntau ti deka dipelajar.

“Taja pia, rebak baru diatu dipeda bisi belajar bekuntau ba luar sekula, ari embing sida ke tuai.

“Kuntau tu matih disiplin, ulah ti meruan, ngasika ajar enggau nempa pemanah kaul sereta nemu bebasaka penemu orang bukai.

“Enda kering jaku, sikar enggau lanchat sereta regas ba batang tubuh enggau runding,” ku iya ngerintai pemaik ari belajar kuntau.

Anderson mega madahka seni kuntau tu patut diambi nyadi sebagi ari aktiviti kokurikulum sekula baka seni ngetanka diri ke bukai.

“Kuntau tu endang patut diajar ba sekula kelebih agi ngagai nembiak rebak baru.

“Kebuah pia laban seni tu pesaka asal enggau kelai bansa kaya enggau main asal ti ulih ngangkatka nama bansa Iban,” tandu iya.